Dekabr oyi boshida Mayamida bo‘lib o‘tgan moda va san’at haftaligida rassom Ivens Sent Kler qiymati 1,2 million dollar bo‘lgan qimmatbaho ayollar sumkasini taqdim etdi. San’at asari sifatida baholangan noyob sumka o‘zining noodatiy dizayni va ishlab chiqarish tarixi bilan barcha mehmonlarni hayratda qoldirdi.
Mazkur aksessuarni yasash uchun Sent Kler Yaponiyadagi mahalliy yog‘och o‘ymakorlari bilan uchrashishga qaror qilgan va u yerda ikki yil davomida ushbu san’at sohasi bilan yaqindan tanishgan. So‘ng olgan bilimlari asosida sumka uchun maxsus yapon yog‘ochidan o‘z qo‘llari bilan rama yasagan.
Sumkaning asosi Italiya charmi va kimono tikish uchun mo‘ljallangan noyob ipak matolari bilan ishlangan. Shuningdek, sumka oltin, zumrad va 18 karatli olmos toshlar bilan bezatilgan.
Ma’lum bo‘lishicha, bunday hashamatli aksessuarni ishlab chiqarish uchun rassom bir yildan ortiq vaqt sarflagan. Bu davr ichida sumka Yaponiya, Gvineya, Italiya va Turkiya bo‘ylab “sayohat qilgan” va mahalliy hunarmandlar uning maxsus dizaynini yaratishda o‘z hissasini qo‘shgan.
“Men hunarmandchilik san’atini hozirgi davrda ham o‘z qadrini yo‘qotmasligini va yanada rivojlanishini istayman. Bugungi kunda barcha narsalarni iloji boricha arzonlashtirish uchun Xitoyga yuboriladi, ammo haqiqatda noyob buyumlar ulgurji savdo uchun ishlab chiqarilmaydi. Men uzoq yillik sayohatlar, tadqiqotlar va innovatsiyalarimni ushbu asarlarga jo qildim, chunki men go‘zallikka, baxtga va mehnatim zoye ketmasligiga ishonaman”, deydi Sent Kler.
Rassomning aytishicha, uning sumkalari sarmoya kiritish uchun eng yaxshi predmetdir, chunki oltin, olmos va qimmatbaho toshlarning qiymati yillar davomida faqatgina oshib boradi.
Izoh (0)