Италия полицияси олтин эритиш заводидаги ўғрилик схемасини фош қилди. Унга кўра, корхона ходими қимматбаҳо металлни сочига яшириб ташқарига олиб чиқаётганлиги аниқланган. Бу ҳақда Lа Republicа газетаси хабар берди.
Маълум қилинишича, яқинда Ро шаҳридан келган полициячилар маҳаллий ломбардни текшираётганда 23 минг евро қийматидаги 250 граммлик олтин қуймани топширмоқчи бўлган мижозга эътибор қаратишган.
“38 ёшли эркак жуда асабийлашган кўринишда эди ва охир-оқибат ўтган йилнинг январигача ишлаган Ломбардия вилоятидаги қуюв заводидан олтинни ўғирлаганини тан олди”, дейилади хабарда.
Шундан сўнг мудофаа бўлинмаси (карабинёр) ходимлари гумонланувчининг уйига тинтув ўтказиш учун боришган ва у ердан ишлов берилмаган олтин бўлакларини топишган.
Эркакнинг айтишича, у қимматбаҳо металлни узун сочига яшириб, ташқарига олиб чиққан. Кейинчалик маълум бўлишича, эркак сўнгги 12 ой ичида деярли 2 кг олтин ўғирлаган ва қуймаларни турли ломбардларга сотиб, тахминан 150 минг евро ишлаб топган. Ҳозирда италиялик тергов остида қолмоқда.
Бундан аввал таиландлик аёл тасодифан чиқиндихонада 12 миллион бат (салкам 368 минг АҚШ доллардан ортиқ) солинган пластик идиш топиб олгани хабар қилинганди.
Изоҳ (0)