Isroil Greta Tunberg va boshqa taniqli faollar bo‘lgan G‘azoga yo‘l olgan Italiya yordam kemasini ushlab, bortdagilarni hibsga oldi. Bu haqda CNN xabar berdi.
Avvalroq “Ozodlik flotiliyasi koalitsiyasi” Isroil harbiylari G‘azoga yordam yetkazishga urinayotgan Madlen kemasiga o‘tirganini ma’lum qilgandi. Kema ekipaji qatorida ekofaol Greta Tunberg va Yevroparlamentning fransiyalik deputati Rima Hassan bor.
“Kema Isroil qirg‘oqlariga yaqinlashmoqda. Yo‘lovchilar o‘z vatanlariga qaytarilishi kutilmoqda”, dedi Isroil Tashqi ishlar vazirligi 9-iyun kuni.
Vazirlik Madlen ekipaji a’zolari zarg‘aldoq rangli qutqaruv nimchasini kiyib, yonma-yon o‘tirgani, va ularga suv va sendvich berilgani aks etgan videoni ommaga e’lon qilgan. “Ozodlik flotiliyasi koalitsiyasi” kema “xalqaro hududda hujumga uchraganini” ma’lum qilgandi.
“Dronlar kemani o‘rab olib, unga oq bo‘yoqqa o‘xshash modda purkagan. Aloqa to‘xtab qolgan. Radio orqali bezovta qiluvchi tovushlar yangramoqda”, deyilgan koalitsiya xabarida.
Isroil Tashqi ishlar vazirligi tomonidan taqdim etilgan videoda dengiz floti xodimi kemaga “G‘azo qirg‘oqlari yaqinidagi dengiz zonasi yopildi” degan radioxabar yuborgani ko‘ringan.
Qayiqdan jonli efirga uzatilgan videoda faol Yasmin Aqar palubadagi oq moddani ko‘rsatib, uning ko‘zlariga ta’sir qilayotganini aytgan. Kema bilan aloqa uzilganidan so‘ng, koalitsiya bortda Tunberg va boshqalarning oldindan yozib olingan video xabarlarini joylashtira boshladi.
“Agar bu videoni ko‘rsangiz, biz Isroilning okkupatsion kuchlari yoki Isroilni qo‘llab-quvvatlovchi kuchlar tomonidan xalqaro suvlarda tutib olingan va o‘g‘irlab ketilganmiz”, dedi Tunberg o‘z videosida.
Isroil bir necha bor yordam qayig‘ining G‘azoga yetib borishini to‘xtatishini maʼlum qilgandi.
“Men Madlen kemasi G‘azoga yetib bormasligini ta’minlash bo‘yicha ko‘rsatma berdim”, dedi Isroil mudofaa vaziri Israel Kats 8-iyun kuni.
Izoh (0)