Italiyaning Freedom Flotilla Coalition (FFC) xalqaro nodavlat tashkiloti kemasi G‘azoga insonparvarlik yordamini yetkazish uchun Sitsiliyadan jo‘nab ketdi. Safar faqatgina hayriya emas, balki Isroilning blokadasiga qarshi tinch harakat ekanligi aytilgan. Bu haqda Al Jazeera xabar berdi.
12 kishilik ekipajda shved iqlim aktivisti Greta Tunberg, irlandiyalik aktyor Liam Kunningham va fransuz-falastinlik Yevropa parlamenti a’zosi Rima Hassan bor. Ular 1-iyun kuni Katania portidan “Madleen” kemasi bilan jo‘nab ketgan. Guruh yordam miqdorini “cheklangan, ammo ramziy” deb atadi. Kema taxminan 8 kun ichida G‘azoga yetib borishi kutilmoqda.
Bundan oldin ham bu kabi yordam kemasi G‘azoga yuborilgan, ammo O‘rta Yer dengizida dronlar hujumiga uchragan edi. Unda “Conscience” nomli kema 2024-yilning may oyida Maltaning hududiy suvlari yaqinida ikki dron hujumiga uchragan. FFC bu hujumda Isroilni ayblagan, lekin mamlakat bu haqda fikr bildirmagan.
“Qanday qiyinchiliklarga duch kelsak ham, harakat qilishdan to‘xtamaymiz. Aks holda insonligimiz yo‘qoladi”, dedi Greta Tunberg.
FFC 2010-yilda tashkil topgan bo‘lib, Falastin xalqini qo‘llab-quvvatlashga asoslangan. U insonparvarlik yordam bilan birga Isroilning G‘azo blokadasiga qarshi norozilik harakatlarini ham olib boradi.
Izoh (0)