Ilon Mask X ijtimoiy tarmog‘ini o‘zining xAI startapiga sotdi. 45 milliard dollarlik bitim tarkibiga 12 milliard dollarlik qarz ham kiritilgan bo‘lib, bundan maqsad platformani sun’iy idrok texnologiyalari bilan chuqur integratsiya qilishdir. Bu haqda Ilon Maskka tayanib CNN xabar bermoqda.
Amerikalik milliarderning so‘zlariga ko‘ra, mazkur kelishuv ortidan X’ning bahosi 33 milliard dollarga yetadi.
xAI va X’ning kelajagi bir-biriga bog‘liq, deb yozdi Mask 28-mart kuni o‘zining X’dagi sahifasida.
Maskning ta’kidlashicha, birlashuv xAI’ning ilg‘or sun’iy intellekt qobiliyatlari va tajribasini X’ning keng auditoriyasi bilan uyg‘unlashtirib, “ulkan imkoniyatlar eshigini ochadi”.
X foydalanuvchilari uchun nima o‘zgaradi?
Mask hozircha X tarmog‘iga hech qanday favqulodda o‘zgarishlar kiritilmasligini aytdi. Shunga qaramay, xAI tomonidan yaratilgan sun’iy intellektli chatbot Grok allaqachon ijtimoiy tarmoqqa integratsiya qilingan. Tadbirkorning qo‘shimcha qilishicha, birlashgan kompaniyalarning umumiy qiymati 80 milliard dollarni tashkil etadi.
Maskning sun’iy idrok sohasidagi ambitsiyalari
Ilon Mask sun’iy idrok sohasida yetakchi bo‘lishga intilmoqda. Tadbirkor dastlabki qadamni 2024-yil boshida tashlab, OpenAI kompaniyasini qariyb 100 milliard dollarga sotib olishga harakat qilgan edi. Biroq kompaniya direktorlar kengashi Maskning 97,4 milliard dollarlik taklifini rad etdi.
Shundan so‘ng Mask dunyoning eng ilg‘or sun’iy intellekt modellari qatoridan o‘rin olgan Grok 3 chatbotini taqdim etdi. U X foydalanuvchilari uchun ochiq bo‘lib, ijtimoiy tarmoq bilan integratsiya qilingan.
Izoh (0)