Ko‘p farzandlilik mashhurlar orasida shunchaki modaga emas, balki haqiqiy g‘oyaga aylanayotganga o‘xshaydi. Rasmiy ma’lumotlarga ko‘ra, Ilon Mask 4 ayoldan 14 farzandning otasi, biroq The Wall Street Journal’ning yangi tekshiruvi Qo‘shma Shtatlar jamoatchiligini larzaga soldi: aslida Mask vorislarning butun bir “legioni”ga ega bo‘lishga ulgurgan ekan.
Ilon Mask yana janjal markazida
Donald Tramp AQSHning 47-prezidenti etib saylanganidan buyon, uning eng yaqin tarafdori — tadbirkor Ilon Mask jahon ommaviy axborot vositalari e’tiboridan chetda qolmayapti. Tesla kompaniyasi egasi go‘yo ataylab o‘z shaxsi atrofida yangi-yangi janjallarni keltirib chiqarayotganga o‘xshaydi. Goh inauguratsiyada yaqin orada Marsni zabt etishini e’lon qiladi, goh o‘z brendiga qarshi chiquvchilarga Kim Kardashyan bilan fotosessiya orqali javob beradi, ba’zida esa o‘zining X ijtimoiy tarmog‘idagi foydalanuvchilarga unchalik do‘stona bo‘lmagan ohangda javob berishgacha borib yetadi.
Biroq Maskning shaxsiyatiga eng katta e’tibor uning Tramp bilan yaqinlashuvidan ko‘ra, ko‘p farzandli bo‘lish haqidagi g‘ayrioddiy ishtiyoqiga qaratilmoqda. Uning to‘rt yoshli o‘g‘li X Æ A-Xii Oq uyning Oval kabinetida bemalol yurgan paytda, qondosh aka-uka va opa-singillarining soni geometrik progressiya bo‘yicha ko‘paymoqda. Xususan, 2025-yil 14-fevralda bloger Eshli Sent-Kler milliarderdan o‘g‘il ko‘rganini ma’lum qildi.
Ehtimol, bu vaziyat hech kimni hayratga solmasdi, faqat Mask bu haqda ovoza bo‘lishini mutlaqo istamasdi. Aynan shu sababli voqea boshqacha tus oldi: tafsilotlarni bilish uchun Amerikaning nufuzli nashriyotlari jurnalistlari shoshib qoldi, qiz esa endi yo‘qotadigan hech narsasi qolmaganini o‘ylab, batafsil izoh berishga rozi bo‘ldi. Eshli milliarder bilan munosabatlari haqida so‘zlab berdi, kelishuv tafsilotlarini oshkor qildi va bularning barchasi faqat o‘g‘li Romulning farovonligi va xotirjamligi uchun zarurligini qat’iyat bilan ta’kidladi.
Eng batafsil tekshiruvni The Wall Street Journal olib bordi. Qizig‘i shundaki, dastlab faqat Sent-Kler ishi haqida bo‘lishi kutilgan maqola butunlay boshqa mavzuga aylanib ketdi. Ma’lum bo‘lishicha, Ilon Mask sayyorani o‘z avlodlari bilan to‘ldirish g‘oyasiga mukkasidan ketgan.
Ilon Maskning bosh g‘oyasi
Milliarder bugungi kundagi eng muhim muammo sifatida tug‘ilish darajasining pasayishini ko‘rmoqda. U o‘zini pronatalizm tarafdorlari safida ekanini ochiq tan oladi — ular ushbu muammoning siyosiy va madaniy yechimlarini amalga oshirishga intilayotgan kishilardir.
Maskning nechta farzandi borligi aniq emas. The Wall Street Journal’ning yaqin doiralari va anonim manbalari 14 raqami ancha kamaytirib ko‘rsatilgan, deb ta’kidlashmoqda.
Ma’lum bo‘lishicha, muammo Ilonning bolalarni yaxshi ko‘rishida emas ekan. Merosxo‘rlarning dunyoga kelishi Marsni o‘zlashtirish bo‘yicha keng ko‘lamli biznes-rejaning bir qismi hisoblanadi. Maskka ko‘ra, sivilizatsiya yo‘q bo‘lib ketish xavfi ostida, shuning uchun u yuqori intellektga ega bo‘lgan odamlarni ko‘paytirish orqali tarixiy jarayonni o‘zgartirishga harakat qilmoqda.
NASA bilan hamkorlik qilish bo‘yicha ulkan rejalar aynan shu maqsad bilan bog‘liq, chunki SpaceX’ning asosiy vazifasi Marsga yetib bora oladigan raketa yaratishdir. Uning boshqa kompaniyalari, jumladan elektromobil ishlab chiqaruvchi Tesla ham bu rejani moliyalashtirishda ko‘maklashmoqda.
Mask farzandlari va ularning onalarini “legion” deb ataydi. Bu aynan minglab askarlarga ega bo‘lgan va Rim imperiyasi chegaralarini kengaytirishda hal qiluvchi rol o‘ynagan qadimiy harbiy tuzilmalardir.
Milliarderning u bilan munosabatga kirishgan ayolga qo‘yadigan yagona talabi — albatta farzand ko‘rish. Ilon o‘z “qurbonlari”ni ko‘pincha X ijtimoiy tarmog‘ida izlaydi: memlarga javob beradi, layk bosadi va ba’zida tvit yozadi. Umuman olganda, u ham hamma erkaklar kabi an’anaviy yo‘ldan boradi.
Maskning ma’shuqalari navbatma-navbat sud kurashlariga aralashib, uning xatti-harakatlari va munosabatlarining g‘alati tafsilotlarini fosh etmoqda. Shu bilan birga, vorislar soni kundan-kunga emas, soatma-soat ko‘payib bormoqda. Ilon Maskning niyati va maqsadlari aniq bo‘lsa-da, oqibati hali noma’lum. Voqealar rivojlanishining ikki yo‘li borga o‘xshaydi: birinchisi — ota va farzandlari haqiqatan ham Marsni zabt etadi, ikkinchisi — tadbirkor ko‘plab “xotin”larining jiddiy ayblovlari girdobiga tushib qoladi.
Bu yerda Ember Xyordning nima aloqasi bor?
11-may kuni Yevropa va Amerikada xalqaro Onalar kuni nishonlandi. Bu yilgi bayram ayrim kutilmagan yangiliklar bilan esda qoldi — Ember Xyord ijtimoiy tarmoqlarida egizaklarning onasi bo‘lganini e’lon qildi. Jonni Depp bilan janjalli ajralishdan so‘ng aktrisa Ispaniyaga ko‘chib ketgan va to‘rt yoshli qizi Una Peyjning tarbiyasi bilan shug‘ullana boshlagandi.
Ehtimol, Oushen ismli o‘g‘li va Agnes ismli qizi surrogat ona yordamida dunyoga kelgan, chunki Emberning o‘zi sog‘lig‘idagi muammolari sabab farzand ko‘ra olmaydi.
Ammo obunachilar bolalarning otasi kim ekanligi haqida jiddiy o‘ylanib qolishdi. Albatta, Emberning o‘zi uning ismini aytmagan. Mantiqiy mulohazalar auditoriyani qiziqarli xulosaga olib keldi — bolalarning otasi Ilon Mask bo‘lishi mumkin. Chunki:
- Ember Xyord va Ilon Mask 2016-yilda 1,5 yil munosabatda bo‘lgan;
- Aktrisaning hamkasbi ta’kidlashicha, juftlik ishqiy munosabatlari davrida bir nechta embrion yaratgan va keyinchalik hatto ularga bo‘lgan huquqlar uchun sudlashgan;
- Ma’lumki, Ilon Mask ko‘p farzandli bo‘lish g‘oyasiga mukkasidan ketgan: uning nazarida sobiq er-xotindan tug‘ilgan farzandlar mutlaqo tabiiy holat hisoblanadi.
Hozircha tomonlarning hech biri bunga rasmiy izoh bermagan, shuning uchun Ilon Maskning Oushen va Agnesning otasi ekani haqida faqat taxmin qilish mumkin.
Izoh (0)