AQSH Davlat samaradorligi departamenti (DOGE) rahbari, amerikalik tadbirkor Ilon Mask super milliarderlar reytingida birinchi o‘rinni egalladi, deb yozadi The Wall Street Journal Altrata kompaniyasining eksklyuziv reytingiga tayanib.
24 ta pozitsiyani o‘z ichiga olgan reytingga ko‘ra, 2025-yil fevral holati bo‘yicha boyligi 419,4 milliard dollarga baholangan Mask dunyodagi eng boy odam hisoblanadi.
Undan tashqari reytingga Amerikaning Amazon onlayn-riteyleri asoschisi Jeff Bezos (263,8 milliard dollar), Fransiyaning hashamatli buyumlar ishlab chiqaruvchi LVMH egasi Bernar Arno (238,9 milliard dollar), Amerikaning Oracle Corporation dasturiy ta’minot ishlab chiqaruvchisi asoschilaridan biri Larri Ellison (237 milliard dollar) va Meta korporatsiyasi rahbari Mark Sukerberg (220,8 milliard dollar) kiritilgan.
Reytingda oltinchi o‘rinni 160,5 milliard dollar boyligi bilan Google hammuassisi Sergey Brin egallagan.
Wall Street Journal’ning aniqlik kiritishicha, dunyodagi eng boy 24 nafar kishining umumiy boyligi 3,3 trillion dollarni tashkil qiladi. Ulardan 16 nafarining boyligi 100 milliard dollardan oshadi.
Merosxo‘rlar emas, balki o‘z kuchi bilan milliarderga aylangan shaxslar
Tadqiqotchilarning ta’kidlashicha, bugungi milliarderlar elitasi o‘tmishdagi eng boy insonlardan sezilarli darajada farq qiladi. 19-asr va 20-asr boshlarida kapitallari moddiy infratuzilmaga asoslangan sanoatchilar o‘ta boyib ketgan. Masalan, Jon Rokfeller neftni, Endryu Karnegi po‘latni, Kornelius Vanderbilt esa temir yo‘llarni nazorat qilgan.
Bugungi kunda nomoddiy aktivlar, intellektual mulk va kelajakdagi o‘sish imkoniyatlari hal qiluvchi ahamiyatga ega. O‘n yillar davomida boyib ketgan eski kapitalistlardan farqli o‘laroq, zamonaviy super milliarderlar o‘z boyliklarini bir necha yil ichida yaratmoqdalar. Texnologiya sohasidagi milliarderlarning boyligi ko‘p jihatdan bozor tebranishlariga bog‘liq. Masalan, Jensen Xuangning boyligi bir yil ichida Nvidia aksiyalarining o‘sishi tufayli o‘nlab milliard dollarga ko‘paydi.
Shuningdek, o‘tgan asrdan farqli o‘laroq, dunyoning eng boy odamlari endi merosxo‘rlar emas, balki tadbirkorlardir.
Heritage Foundation tadqiqotiga ko‘ra, 2005-yilda Forbes 400 ro‘yxatiga kiritilgan va o‘z boyligini meros qilib olgan 97 nafar milliarderning yarmidan kam qismi hozirgi reytingda saqlanib qolgan.
Izoh (0)