Sudanda 25 million kishi ochlikdan aziyat chekmoqda, shu jumladan 770 ming bola bu yil o‘tkir to‘yib ovqatlanmaslikning og‘ir shakliga duchor bo‘ladi. Bu haqda Jenevadagi brifingda Jahon sog‘liqni saqlash tashkilotining (JSST) Sharqiy O‘rta yer dengizi bo‘yicha mintaqaviy direktori Xanan Balxi ma’lum qildi.
“E’tibordan chetda qolayotgan yana bir halokatli inqiroz - bu Sudan... Ochlik va to‘yib ovqatlanmaslikdan 25 million kishi, jumladan, bu yil o‘tkir to‘yib ovqatlanmaslikning og‘ir shakliga duchor bo‘lgan 770 ming bola aziyat chekmoqda”, - deydi Xanan Balxi.
Balxining qo‘shimcha qilishicha, vabo, poliomiyelit, qizamiq, denge isitmasi va bezgakning bir vaqtning o‘zida tarqalishi mojaro tufayli izdan chiqqan sog‘liqni saqlash tizimiga zarar yetkazmoqda.
JSST ma’lumotlariga ko‘ra, tibbiyot muassasalari, tez yordam mashinalari, bemorlar va tibbiyot xodimlariga qarshi 167 ta tasdiqlangan hujumlar natijasida 1120 dan ortiq odam halok bo‘lgan.
2023-yil 15-apreldan beri Sudanda Muhammad Hamdan Daglo boshchiligidagi Tezkor harakat kuchlari va muntazam armiya o‘rtasida shiddatli janglar davom etmoqda.
2025-yil may oyi boshida Jahon sog‘liqni saqlash tashkiloti (JSST) bosh direktori Tedros Adxanom Gebreyesus Sudandagi mojaro oqibatida 32 mingga yaqin odam halok bo‘lgani, aholining 30 foizi ko‘chib ketishga majbur bo‘lgani, 20 million kishi esa gumanitar yordamga muhtojligini ma’lum qilgandi.
Dunyoda o‘tkir oziq-ovqat taqchilligi sababli qariyb 300 million kishi ochlikdan o‘lish mumkinligi ma`lum qilingandi.
Aprel oyida AQSH tibbiy yordam dasturlari qisqartirilgani sabab Janubiy Sudanning sharqiy Jongley shtatida kamida sakkiz kishi, jumladan besh nafar bola halok bo‘ldi. Gap shundaki, ular mahalliy klinikalar yopilgani bois issiqda uch soatlik yo‘l bosib, vafot etgan.
Izoh (0)