O‘zbekistonda saratonga chalingan bolalar 100 foiz ixtisoslashtirilgan tibbiy yordam bilan qamrab olinadi. Prezident qarori bilan 2025—2030-yillarda O‘zbekistonda bolalar saratoniga qarshi kurashishning asosiy maqsadlari belgilandi.
“2025—2030-yillarda bolalar saratoniga qarshi kurashish bo‘yicha O‘zbekiston Respublikasi milliy strategiyasini amalga oshirish chora-tadbirlari to‘g‘risida”gi qarorga ko‘ra,
- bolalar saratonini erta bosqichlarda aniqlash holatlari ulushini 65 foizgacha oshirish;
- onkologik va onkogematologik kasalliklarga chalingan bolalarning 1 yillik yashovchanligini 34 foizdan 90 foizgacha, 5 yillik yashovchanligini esa kamida 60 foizgacha oshirish ham maqsad qilingan.
2025—2030-yillarda bolalar saratoniga qarshi kurashish bo‘yicha O‘zbekiston milliy strategiyasi ishlab chiqilgandi. Farmon bilan 2025—2026-yillarda bolalar saratoniga qarshi kurashish bo‘yicha O‘zbekiston milliy strategiyasini amalga oshirish bo‘yicha kompleks chora-tadbirlar dasturi tasdiqlandi.
Strategiyani joriy etish loyihasi 2025—2026-yillarda Samarqand shahri va Ishtixon tumanidagi tibbiyot muassasalari bazasida amalga oshiriladi hamda kelgusida zarur shart-sharoitlar yaratilishiga qarab mamlakatning boshqa hududlariga parallel ravishda kengaytiriladi.
Qarorga ko‘ra, 2025-yil 1-iyulgacha “Elektron sog‘liqni saqlash” axborot tizimida onkologik va onkogematologik kasalliklarga chalingan bolalarni ro‘yxatga olish, tashxislash, davolash, dispanser kuzatuvi hamda yo‘naltirish jarayonlarini o‘z ichiga olgan bemorlarning raqamlashtirilgan marshruti joriy etiladi. Bunda shifokor qabuliga masofadan yozilish hamda onlayn konsultatsiyalar o‘tkazish imkoniyati yaratiladi.
2025-yil yakunigacha Strategiyani joriy etish loyihasini amalga oshirish doirasida sun’iy intellekt texnologiyalari joriy etiladi.
Bolalar onkologiyasi, gematologiyasi va immunologiyasi ilmiy-amaliy tibbiyot markazi huzurida Bolalar saratoni bo‘yicha xalqaro akademik xab tashkil etiladi.
Akademik xab ilmiy-ta’lim muassasasi hisoblanadi hamda unga quyidagi asosiy vazifalar yuklatiladi:
- xalqaro sertifikatlashtirish va uzluksiz tibbiy ta’lim tizimi bo‘yicha ballar to‘plash standartlariga mos keladigan xalqaro ta’lim dasturlarini joriy etish;
- strategik rejalashtirish va profilaktik chora-tadbirlar ishlab chiqish uchun bolalar saratoni bilan kasallanishning epidemiologik tendensiyalarini tahlil qilish va prognozlash.
Shavkat Mirziyoyev raisligida 7-may kuni bo‘lib o‘tgan videoselektor yig‘ilishida ushbu akademik xab Markaziy Osiyoda yagona bo‘lishi aytilgandi. Prezident joylardagi bolalar shifoxonalarining onko-gematologiya bo‘limlarini kasallikni erta bosqichda aniqlaydigan eng zamonaviy uskunalar bilan jihozlashni topshirgandi.
Izoh (0)