Sudandagi to‘qnashuvlar chog‘ida 97 kishi halok bo‘ldi, 365 kishi yaralandi, deb xabar bermoqda Reuters shifokorlar uyushmasiga tayanib. Jahon sog‘liqni saqlash tashkiloti maʼlumotlariga ko‘ra, 13-apreldan beri kamida 83 kishi halok bo‘lgan, 1100 dan ortiq odam jarohat olgan. Qurbonlar orasida Birlashgan Millatlar Tashkiloti Jahon oziq-ovqat dasturining 3 nafar xodimi bor.
16-aprel kuni nizolashayotgan tomonlar – muntazam armiya va “Tezkor harakat kuchlari” BMTning harbiy harakatlarni yarim kunga to‘xtatish haqidagi taklifiga rozi bo‘ldi.
BMT Jahon oziq-ovqat dasturi direktori Sindi Makkeyn mojaro tomonlarini xodimlar xavfsizligini ta’minlaydigan, tashkilot xodimlari va uning hamkorlariga Sudanning muhtoj aholisiga gumanitar yordam ko‘rsatish imkonini beradigan kelishuvga erishishga chaqirdi.
Sudanda to‘qnashuvlar 15-aprel kuni ertalab boshlangan, unda artilleriya va aviatsiyadan foydalanilmoqda. Kuzatuvchilar Sudandagi mojaro sababini “Tezkor harakat kuchlari”ni Sudan Qurolli kuchlariga qo‘shib olish borasidagi bahslar, kengroq aytganda, hokimiyatning harbiylardan tinch aholiga o‘tishi bilan bog‘liq tortishuvlar sifatida keltirmoqda.
To‘qnashuvlar Xartum va mamlakatning boshqa shaharlarini qamrab olgan.
Vitse-prezident general Dagaloga bo‘ysunuvchi “Tezkor harakat kuchlari”ning vakillari poytaxtdagi qator muhim obyektlar, jumladan, prezident saroyini egallab olgani haqida ma’lum qilgandi. Sudan hukumati rahbari general Al-Burxon buni rad etmoqda.
Izoh (0)