Jahon sog‘liqni saqlash tashkiloti (JSST)ning Rossiyadagi ofisi rahbari Botir Berdiqilichevning aytishicha, hozirda 1 milliarddan ortiq yoshlar musiqani sog‘liqqa zararli holatda tinglash odatlari sabab eshitish qobiliyatini yo‘qotish xavfi ostida qolmoqda.
1 milliarddan ortiq yoshlar noto‘g‘ri tinglash odatlari sabab eshitish qobiliyatini yo‘qotish xavfiga duch kelayotgani achinarli. Biroq to‘g‘ri xatti-harakatlar bilan buning oldini olish mumkin, deydi mutaxassis.
Uning so‘zlariga ko‘ra, 2050-yilga kelib, taxminan, 2,5 milliard yoshlar eshitish muammolariga duch keladi va kamida 700 million kishi eshitish qobiliyatini yo‘qotgani bois reabilitatsiyaga muhtoj bo‘ladi.
Haddan tashqari baland tovushlar eshitish qobiliyatiga salbiy ta’sir ko‘rsatuvchi omillardan biri hisoblanadi, ular hujayralarning shikastlanishiga olib kelishi mumkin. Biroq o‘z vaqtida zarur choralar ko‘rib, eshitish qobiliyatini yo‘qotish holatlarining 60 foizdan ortig‘ining oldini olish mumkin. Eng samarali profilaktika chorasi esa tovushlar balandligini sog‘liqqa xavfsiz me’yorlarda tinglashdir.
Musiqani xavfsiz tinglash bo‘yicha maxsus me’yorlar mavjud, ammo ko‘plab yoshlar ularga rioya qilmaydi. Bu esa eshitish qobiliyatining yo‘qolishi xavfini oshiradi. Hozirda dunyo aholisining taxminan 5 foizi eshitish qobiliyatini yo‘qotgan.
Izoh (0)