Sudan poytaxti Xartumning bir qancha tumanlarida va shahar chekkasida otishma ovozlari eshitilmoqda, deb xabar berdi Reuters guvohlarga tayanib.
Mahalliy aholining so‘zlariga ko‘ra, ko‘chada artilleriya qurilmalari va zirhli texnikalar joylashtirilgan. Ulardan biri agentlikka Sudan armiyasi va ularga qarshi tuzilma — “Tezkor harakat kuchlari” (RSF) shtab-kvartirasi yaqinida og‘ir artilleriya o‘qlarining ovozini eshitganini aytdi.
“Al-Jazira” shaharning turli joylarida tutun ko‘tarilayotgani, ko‘chalarga askarlar joylashtirilgani haqida yozdi.
RSF tomonining ma’lum qilishicha, armiya harbiy xizmatchilari ularning Xartumdagi bazalaridan birini qurshab olib, turli xil qurollardan o‘qqa tutgan. RSF kuchlari mamlakat shimolidagi Muravi bazasi, shuningdek, Xartum xalqaro aeroporti ustidan nazorat o‘rnatganini da’vo qilmoqda. OAV xabarlariga ko‘ra, aeroport ishlashdan to‘xtagan.
O‘z navbatida, Sudan armiyasi vakili RSF kuchlarini Xartum va boshqa hududlarda joylashgan armiya lagerlariga hujum qilishda aybladi.
2019-yilda “Tezkor harakat kuchlari” (RSF) va Sudan armiyasi birgalikda mamlakatdagi harbiy to‘ntarishda ishtirok etgandi. O‘shanda mamlakatni 30 yildan buyon boshqarib kelayotgan prezident Umar al-Bashir hokimiyatdan chetlashtirilgan. Ikki yil o‘tib, 2021-yil oktabr oyida Sudanda RSF tuzilmasi va muntazam armiya ishtirokida navbatdagi davlat to‘ntarishi bo‘lib o‘tdi.
2021-yilgi davlat to‘ntarishidan buyon Sudanni O‘tish davri harbiy-fuqarolik maʼmuriyati — o‘tish davri suveren kengashi boshqarmoqda. Mamlakat armiyasi va demokratiya tarafdori bo‘lgan guruhlar RSF’ning Qurolli kuchlarga qo‘shilishini talab qilmoqda. Ushbu masala bo‘yicha muzokaralar keskinlik chiqarishda davom etmoqda, shu sababli aprel oyi boshida Sudan suveren kengashi va muxolifatchilar o‘rtasida mamlakatda o‘tish davri fuqarolik hokimiyatini yaratish to‘g‘risidagi bitimni imzolash 3-marta qoldirildi.
Izoh (0)