O‘zbekistonda Bolalar onko-gematologiya markazi huzurida Bolalar saratoni bo‘yicha akademik xab tashkil qilinadi. Bu haqda 7-may kuni Shavkat Mirziyoyev raisligida bo‘lib o‘tgan videoselektor yig‘ilishida ma’lum qilindi.
Yig‘ilishda qayd etilishicha, O‘zbekistonda bolalardagi onko-gematologik kasalliklarning yarmidan ko‘pi so‘nggi bosqichlarda aniqlanmoqda. Shu bois xuddi onkologiyada bo‘lgani kabi bolalar saratoniga qarshi kurashish bo‘yicha ham besh yillik dastur qabul qilinadi. Bunga kamida 110 million dollar yo‘naltiriladi.
Bolalar onko-gematologiya markazi huzurida Bolalar saratoni bo‘yicha akademik xab tashkil qilinib, yuqori malakali xorijiy mutaxassislar olib kelinadi. Markaziy Osiyoda yagona bo‘ladigan ushbu akademik xabda mintaqadagi shifokorlar bolalar saratoni kasalliklarini erta aniqlash va davolash bo‘yicha xalqaro standartlar asosida o‘qitiladi.
Shuningdek, joylardagi bolalar shifoxonalarining onko-gematologiya bo‘limlari kasallikni erta bosqichda aniqlaydigan eng zamonaviy uskunalar bilan jihozlanadi.
Prezident bu ishlarni tashkil qilish bo‘yicha tegishli qaror loyihasini kiritishni topshirdi.
O‘zbekistonda bolalar saratoniga qarshi kurash
O‘zbekistonda sog‘liqni saqlash tizimini isloh qilish davlat dasturlari doirasida bolalarga onkologik, gematologik va immunologik yordam ko‘rsatishni yaxshilashga alohida e’tibor qaratilmoqda. Xususan, Bolalar gematologiyasi, onkologiyasi va klinik immunologiyasi markazini tashkil etish, uning kadrlar salohiyatini oshirish, moddiy-texnik bazasini mustahkamlash hamda bemorlar uchun qulay shart-sharoitlar yaratish va ularni zarur dori-darmonlar bilan ta’minlash bo‘yicha chora-tadbirlar amalga oshirildi.
“O‘zbekiston-2030” strategiyasida onkologik kasalliklar sababli erta o‘limni 2,5 barobarga qisqartirish vazifasi belgilangan. Jahon sog‘liqni saqlash tashkilotining bolalar saratoniga qarshi kurash bo‘yicha global tashabbusida ishtirok etish doirasida 2030-yilgacha onkologik kasalliklarga chalingan bolalarning omon qolish darajasini 60 foizga oshirish maqsad qilingan.
2024-yilning mayida “Onkologik, gematologik va immunologik kasalliklarga chalingan bolalarga tibbiy yordam ko‘rsatishni yanada takomillashtirish chora-tadbirlari to‘g‘risida”gi prezident qarori qabul qilingandi. Unga ko‘ra, Bolalar gematologiyasi, onkologiyasi va klinik immunologiyasi markazi Bolalar onkologiyasi, gematologiyasi va immunologiyasi ilmiy-amaliy tibbiyot markazi etib qayta nomlandi. Markaz huzurida Onkologik va gematologik kasalliklarga chalingan bolalarni sog‘lomlashtirishga ko‘maklashish jamg‘armasi tashkil etildi.
Izoh (0)