Sudanning hokimiyatdan ag‘darilgan prezidenti Umar al-Bashir ko‘p sonli mahbuslar hamrohligida Kober qamoqxonasidan qochib ketdi. Bu haqda Al Araby xabar berdi.
![](/static/2023/zulfiya/photo_2023-04-24_15-35-09.jpg)
Ma’lum qilinishicha, qamoqxona yaqinida Sudan Qurolli kuchlari va Tezkor harakat kuchlari (RRF) o‘rtasida to‘qnashuv bo‘lgan. Biroq Al Araby nashri Umar al-Bashir qamoqxonaga qilingan hujumdan keyin boshqa mahbuslar bilan birga hibsda ekanini xabar qilgandi.
2019-yil apreldagi harbiy to‘ntarishdan so‘ng Umar al-Bashir hokimiyatdan chetlatilgan. U 30 yildan ortiq davlat rahbari lavozimida ishlagan. To‘ntarish butun mamlakatni qamrab olgan norozilik namoyishlari fonida yuz berdi. Namoyishchilar al-Bashir hukumatidan narxlarni pasaytirishga erishishni, shuningdek, har hafta sodir bo‘ladigan elektr ta’minotidagi uzilishlar muammosini hal qilishni talab qilgan.
2008-yilning 21-iyulida Gaaga sudi al-Bashirni Darfurdagi mojaroga aloqador genotsidda ayblab, hibsga olish uchun order berdi. Shunday qilib, al-Bashir xalqaro adliya organi tomonidan ayblangan dunyodagi birinchi amaldagi prezidentga aylangan.
Joriy yilning aprel oyi o‘rtalarida suveren kengash (mamlakat boshqaruv organi)ni boshqarayotgan Abdel Fattoh al-Burxon va uning o‘rinbosari Muhammad Daglo o‘rtasidagi kelishmovchilik tufayli mamlakatdagi vaziyat keskinlashdi. 15-aprel kuni ertalab Meroye shahridagi harbiy baza yaqinida va poytaxt Xartumda armiya hamda tezkor harakat kuchlari o‘rtasida to‘qnashuvlar boshlandi.
21-aprel kuni Jahon sog‘liqni saqlash tashkiloti (JSST) vakili Margaret Xarris brifingda Sudandagi to‘qnashuvlarda halok bo‘lganlar soni 400 kishidan oshganini, mamlakatda 3,5 mingdan ortiq kishi jarohatlanganini aytdi.