Janubiy Sudanda iyun oyida qo‘zg‘agan vabo epidemiyasi qurbonlari soni 29 kishiga yetdi. “RIA Novosti”ning BMT Gumanitar masalalarni muvofiqlashtirish boshqarmasiga asoslanib xabar berishicha, mamlakatda minglab odamlar mazkur kasallik bilan zararlanish xavfi ostida yashamoqda.
Hozirgacha vabo bilan zararlangan bemorlar soni 484 kishiga yetgan, ularning olti nafarini besh yoshgacha bo‘lgan bolalar tashkil etadi.
Epidemiyani to‘xtatish bo‘yicha shoshilinch choralar ko‘rilayotganiga qaramay, besh yoshgacha bo‘lgan qariyb 5 ming bolaning vabo bilan kasallanib, halok bo‘lishi xavfi mavjud.
Ayni vaqtda Jahon sog‘liqni saqlash tashkiloti va gumanitar xodimlar vaboga qarshi emlash ishlarini olib bormoqda. Janubiy Sudan Sog‘liqni saqlash vazirligi epidemiya haqida 23-iyun kuni – kasallik natijasida 18 kishi halok bo‘lganidan so‘ng ma’lum qilgandi.
O‘tgan yili Janubiy Sudanda vabo epidemiyasi natijasida kamida 167 kishi vafot etgandi.
Izoh (0)