Toshkentning ikki tumanida avtomatik havo monitoringi stansiyalari o‘rnatildi, deb xabar bermoqda Ekologiya vazirligi.
Qayd etilishicha, Ekologiya, atrof-muhitni muhofaza qilish va iqlim o‘zgarishi vazirligi hamda “Zamin” xalqaro jamoat fondi tomonidan Toshkent shahrining Yashnobod va Olmazor tumanlarida 2 ta avtomatik havo monitoringi stansiyasi o‘rnatildi va ishga tushirildi.
Bu “Atmosfera havosi ifloslanishi monitoringini avtomatlashtirish” loyihasi doirasida amalga oshirildi. O‘rnatilgan stansiyalar havo ifloslanishini yuqori darajadagi aniqlikda o‘lchash bo‘yicha patentlangan texnologiyalarga ega.
Ta’kidlanishicha, avtomatik stansiyalarni o‘rnatish joyini tanlash turli omillarga bog‘liq. Ular orasida aholi zich joylashgan hududlar, asosiy yo‘llar va transport magistrallari, muhofaza qilinadigan tabiiy hududlar muhim o‘rin tutadi. Bu o‘z navbatida aholi turmush sifatini yaxshilash va atrof-muhitni muhofaza qilish bo‘yicha qarorlar qabul qilish uchun aniq ma’lumotlar to‘plash va ulardan samarali foydalanish imkonini beradi.
Stansiyalar sonining ko‘payishi, albatta bu borada malakali kadrlarni talab qiladi. Shuning uchun ham Gidrometeorologiya agentligi xodimlari stansiyalardan kelayotgan ma’lumotlarni tahlil qilish, shuningdek, uskunalar va dasturiy ta’minotdan foydalanish bo‘yicha muntazam ravishda o‘qitilmoqda.
Jahon sog‘liqni saqlash tashkiloti hisob-kitoblariga ko‘ra, havo ifloslanishi tufayli har yili 7 millionga yaqin odam vafot etadi. Global iqlim va sog‘liqni saqlash alyansi kompaniyasi rahbari Shveta Narayaning aytishicha, yuqori ifloslanish darajasini qayd etgan hududlar ko‘mir, neft va gazdan eng ko‘p foydalanishi ma’lum bo‘ldi.
Changli havoda nima qilish kerak?
Sanepidqo‘mitaning changli havoda qilish kerak bo‘lgan qator tavsiyalari quyidagilardan iborat:
- Ko‘chaga iloji boricha kamroq chiqish;
- Ishga, o‘qishga, xarid uchun ko‘chaga chiqqanda tibbiy niqob taqish va har 2 soatda almashtirish;
- Ko‘chadan uyga qaytgach dush qabul qilish (soch va yuz-ko‘zlarni yaxshilab yuvish);
- Kalit, ko‘zoynak, telefon va sumkani namlangan salfetka bilan yaxshilab artish;
- Ko‘chaga kiyib chiqqan kiyimlarni yuvish;
- Ustki kiyimlarni (kostyum, plash, palto va boshqalar) maska taqqan holda tashqarida yaxshilab qoqish;
- Nim taʼsir etuvchi tuzli suv bilan tomoq va burunlarni tez-tez chayish;
- Ko‘proq suyuqlik (iliq) ichish, iloji bo‘lsa ko‘k choy, naʼmatak damlamasini ichish;
- Yog‘li, qovurilgan, dudlangan, tuzlangan, sho‘r, achchiq taomlarni cheklash;
- Suyuq sabzavotli taomlar, sut va sut mahsulotlari (qatiq, kefir va boshqalar), ko‘katlarni isteʼmol qilish;
- Chang ko‘p to‘planishining oldini olish va uyni hamda yuzalarni to‘g‘ri tozalash kerak;
- Uy, ishxona va mashina eshiklari va derazalarini zich yopish;
- Chang yig‘ilishi mumkin bo‘lgan hamma narsalarni changyutgich yordamida tozalash kerak (kovrolin, gilam, yumshoq mebel, yumshoq o‘yinchoqlar va boshqalar). Yumshoq mebelni qoqishdan avval usti namlangan latta bilan o‘ralishi tavsiya etiladi.
- Chang yig‘ilishi mumkin bo‘lgan barcha yuzalarni (pol, shkaf, ishchi yuzalar va boshqalar) kun davomida bir necha marta namlangan latta bilan yaxshilab artish kerak;
- Oyoq kiyimlarni eshik oldida qoldirish va imkon qadar tezroq yuvib qo‘yish kerak;
- Xona havosi optimal namligini taʼminlash: ho‘l sochiqlarni xonalarga osish, kattaroq sig‘imli idishlarga suv solib qo‘yish.
Izoh (0)