Vaksina taqchilligi sharoitida dunyoning 15 davlatida vabo tez tarqalmoqda. Bu haqda Jahon sog‘liqni saqlash tashkiloti (JSST) bosh direktori Tedros Adanom Gebreyesusga tayanib, “TASS” xabar berdi.
JSST direktori xalqaro hamjamiyatni “tezda ortib borayotgan tahdid”ga javob berishga chaqirdi.
“Yillar davomida insoniyatning vaboga qarshi kurashida erishilgan yutuqlardan so‘ng, o‘limga olib keladigan kasallik mojarolar, qashshoqlik, iqlim inqirozi va global ijtimoiy-iqtisodiy tengsizlik sabab 30 mamlakatga qaytdi”, — dedi JSST rahbari.
Tashkilot Gaiti, Zambiya, Zimbabve, Sudan va Efiopiyadagi epidemiyalardan xavotirda. Gebreyesusning eslatishicha, 2022-yil oktyabr oyida vaboga qarshi vaksina taqchilligi sharoitida ikki dozali emlash o‘rniga bir dozali emlash joriy etilgan.
“Tegishli chora-tadbirlarga qaramay, 2024-yil boshida zaxiralar yo‘q edi. Vaksina 15 mamlakat epidemiyalar haqida xabar berayotgan bir paytda tugab qoldi. Bunday vaziyatda dunyo vabo tez sur’atlar bilan tarqayotganini tushunishi kerak”, — dedi Gebreyesus.
U toza suvdan foydalanishni ta’minlash va “atrof-muhitni ifloslantirmaydigan hojatxonalardan foydalanishga” chaqirdi. Unga ko‘ra, vabo epidemiyasini tezda aniqlashga qodir epidemiologik nazorat tizimi zarur. Vaksina ishlab chiqarishni ham rag‘batlantirish va ko‘paytirish kerak.
2023-yilda dunyoning 30 ta davlatida 708,2 mingdan ortiq vabo kasalligi qayd etilgan, 4,3 mingdan ortiq odam vafot etgan. To‘qqizta davlatda kasallanganlar soni 10 mingdan oshgan. Tashkilot ma’lumotlariga ko‘ra, 2022-yilda dunyoda 472 697 ta, 2021-yilda esa 223 370 ta vabo kasalligi aniqlangan.
Izoh (0)