Isroil G‘azo sektorida bir qancha yangi obyektlar qurilishini boshladi. Ular gumanitar yordamni taqsimlash markazlari sifatida foydalanilishi mumkinligi aytilmoqda. Bu haqda BBC sun’iy yo‘ldoshdan olingan rasmlarga tayanib xabar berdi.
BBC Verify tomonidan tahlil qilingan suratlarga ko‘ra, bir qancha yer uchastkalari qurilishga hozir qilib tozalangan. Jumladan, so‘nggi haftada G‘azo janubi va markazida yangi yo‘llar va qurilish maydonchalari paydo bo‘lgan.
Isroil bunday taqsimlash markazlari qayerda bo‘lishini ochiq aytmagan. G‘azoning janubiy qismida kamida to‘rtta markaz, shimolroqda, ya’ni harbiylar nazoratidagi Netzarim yo‘lagi yaqinida yana bittasi qurilmoqda.
“G‘azo gumanitar jamg‘armasi” Isroilni tarqatish markazlari to‘liq ishga tushgunga qadar odatdagi kanallar orqali yordam ko‘rsatishga ruxsat berishga chaqirgan. G‘azo shimolida dastlabki rejada ko‘zda tutilmagan yordam markazlarini qurish tashabbusi bilan chiqqan.
Bu jamg‘arma G‘azoda davom etayotgan gumanitar inqiroz davrida insonparvarlik yordamni tarqatish uchun ochilgan. U dastlab 1,2 million kishiga, ya’ni aholining 60 foizidan kamrog‘iga oziq-ovqat, suv va gigiyena to‘plamlari yetkazib berilishini ma’lum qilgan edi. 14-may kuni u oyning oxirigacha ish boshlashini e’lon qilgan.
Ma’lum bo‘lishicha, taklif etilayotgan yangi tizim hali Isroil hukumati tomonidan imzolanmagan. Isroil 2-martdan beri G‘azo sektoriga gumanitar yordam olib kirishni to‘xtatib qo‘ygan. Oqibatda anklavda 57 nafar bola vafot etgan, kuchli ocharchilik boshqalarga ham xavf solmoqda.
Izoh (0)