Isroil G‘azo sektorining 70 foiz hududiga falastinliklar kirishini cheklab qo‘ydi, bu hududlardan aholi majburan ko‘chirilmoqda. Bu haqda Al Jazeera xabar berdi.
G‘azo janubidagi Rafah shahrining katta qismi taqiqlangan hudud deb e’lon qilingan. Isroil harbiylari mart oyi oxiridan majburiy ko‘chirishga buyruq berishni boshlagan. Shimolda ham deyarli butun G‘azo hududi xuddi shunday holatda. Shujayea kvartali sharqidagi va Isroil chegarasidagi hududlarga ham kirish cheklangan. Faqatgina shahar shimoli-g‘arbidagi kichik hududlarga kirish imkoniyati mavjud.
Quyidagi animatsion xaritada Isroil harbiylari 18-mart kunidan beri majburan ko‘chirish e’lon qilgan hududlar tasvirlangan.
Isroil bosh vaziri Binyamin Netanyaxu 5-may kuni G‘azoning ikki milliondan ortiq aholisini Isroil qo‘shinlari egallagan hududga ko‘chirilishini aytgandi. Shu tariqa yahudiy davlati hududdagi o‘zining mavjudligini mustahkamlashni ko‘zlagan.
Falastinliklar fikricha, Isroil nafaqat HAMASning harbiy salohiyatini yo‘q qilishga, balki G‘azo aholisini ham yo‘q qilishga harakat qilmoqda.
G‘azoda tinchlik muzokaralari urush soyasida qolmoqda
Ikki oy davom etgan o‘t ochishni to‘xtatish bo‘yicha kelishuvdan keyin Isroil 18-martga o‘tar kechasi G‘azoga aviazarbalar berishni tikladi. HAMAS nishonga olinishi aytilgan dastlabki hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari, 560 dan ortiq kishi jarohatlandi.
Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan. Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilgan. Netanyaxu aybni to‘g‘ridan to‘g‘ri HAMASga yuklagan.
Kelishuvning ikkinchi bosqichi Isroildan o‘z kuchlarini G‘azodan olib chiqishni talab qilardi. Hatto 19-yanvarda kuchga kirgan va Isroil qamoqxonalaridagi falastinliklar evaziga garovdagilar ozod etilgan birinchi bosqichda ham Isroil G‘azoda 150 dan ortiq falastinlikni o‘ldirgan.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan. U G‘azoda yuzlab odam o‘limiga sabab bo‘lgan hujumlar “faqat boshlanishi” ekanini ta’kidlagan.
Izoh (0)