Isroil armiyasi askarlari G‘azodagi ash-Shifa kasalxonasida harbiy amaliyot o‘tkazgandan so‘ng, mazkur hududni tark etmoqda. Bu haqda Al Jazeera xabar berdi.
Xabarga ko‘ra, Isroil qo‘shinlari ikki hafta davom etgan harbiy amaliyotdan so‘ng Ash-Shifa majmuasi va uning atrofidan to‘liq chiqib ketmoqda.
Tibbiyot majmuasi binolari yonib ketgan yoki yaroqsiz holga kelgan, vayronagarchilik ko‘lami juda katta. Qo‘shinlar ketgach, shifoxona hududi va uning atrofidagi ko‘chalarda o‘nlab jasadlar topilgan.
Isroil Bosh vaziri Binyamin Netanyaxu 31-mart kuni bo‘lib o‘tgan matbuot anjumanida harbiylar 18-mart kuni Ash-Shifa tibbiyot markazida boshlangan operatsiya davomida 200 dan ortiq qurolli radikalni yo‘q qilganini aytgan.
Bosh vazirning so‘zlariga ko‘ra, mazkur kasalxona HAMAS harakatining markaziy qarorgohiga aylantirilgan. Isroil armiyasi tinch aholiga, bemorlarga, tibbiy guruhlarga yoki jihozlarga zarar yetkazmasdan ehtiyotkorlik bilan harakat qilishini ta’kidlagan edi. Biroq Jahon sog‘liqni saqlash tashkiloti rahbari Tedros Adhanom Gebreyesusning aytishicha, 18-martdan beri tibbiyot majmuasida 21 nafar tinch aholi vakillari vafot etgan.
G‘azo Sog‘liqni saqlash vazirligi bergan so‘nggi hisobotga ko‘ra, G‘azodagi qurbonlar soni 7-oktyabrdan beri 32 782 kishiga yetgan, 75 298 kishi jarohatlangan.
Izoh (0)