O‘ta og‘ir kasalliklar bilan og‘rigan 85 nafar falastinlik 30-iyul kuni davolanish uchun G‘azodan BAAga jo‘natildi. Bu haqda Jahon sog‘liqni saqlash tashkiloti tarqatgan xabarga asoslanib, Al Arabiya nashri xabar berdi.
Manbada aytilishicha, bemorlar o‘ta og‘ir darajadagi, hayot uchun xavfli jarohatlarga ega. G‘azo hududida ularga yordam ko‘rsatishning hech qanday imkoni yo‘q. Bemorlar Birlashgan Arab Amirliklariga borgach, u yerda murakkab jarrohlik amaliyotini boshdan kechirishi xabar qilingan.
Jahon sog‘liqni saqlash tashkiloti maʼlumotlariga ko‘ra, bemorlarning 35 nafari bolalar va 50 nafari yoshi kattalardan iborat. Bemorlar bilan birga ularning 63 nafar qarindoshlari ham BAAga jo‘nab ketgan.
Bemorlar dastlab G‘azodan Kerem Shalom o‘tkazuv punkti orqali Isroilga kirgan. So‘ngra ular Isroil janubidagi Eylat shahriga, Ramon aeroportiga ko‘chirilgan. Ushbu aeroportdan Abu-Dabiga jo‘nab ketilgan.
“53 nafar bemor saraton kasalligiga chalingan, ulardan to‘rt nafari bola. Yana 20 nafarida og‘ir darajadagi tana shikastlanishlari bor. Uch nafar falastinlik qon kasalliklari bilan og‘rigan, jumladan talassemiya va shu kabi xastaliklar. Uchta bemorda tug‘ma kasalliklar aniqlangan. Shuningdek, ikki bemorda fankoni anemiyasi, bir kishida nevrologik kasallik, yana uch kishida yurak, buyrak va jigar xastaliklari qayd etilgan”, deyilgan JSST hisobotida.
Maʼlumotlarga ko‘ra, joriy yilning oktyabr oyidan beri G‘azodan tashqarida davolanish uchun 5000 ga yaqin falastinlik evakuatsiya qilingan. Ularning 80 foizdan ortig‘i Misr, Qatar va BAAda jo‘natilgan.
G‘azo Sog‘liqni saqlash vazirligi anklav hududida tibbiy evakuatsiyaga muhtoj 10 000 nafar fuqaro borligini aytgan. Qo‘shni arab mamlakatlarini yordam dasturini kuchaytirishga tibbiy muassasalarni tiklashda yordam berishga chaqirgan.
Izoh (0)