G‘azo sektori Sog‘liqni saqlash vazirligi 31-avgust kuni bolalarni poliomiyelitga qarshi emlash kampaniyasi boshlanganini e’lon qildi. Bu haqda CNN xabar berdi.
Ma’lum bo‘lishicha, BMTning Bolalar jamg‘armasi va uning hamkorlari 1—12-sentyabr kunlari G‘azodagi bolalarni poliomiyelitga qarshi emlaydi.
Emlashni o‘tkazish to‘g‘risidagi qaror anklav 25 yil ichida birinchi poliomielit holati haqida xabar berganidan keyin qabul qilingan. Jahon sog‘liqni saqlash tashkiloti (JSST) G‘azoda hali ham alomatlarini ko‘rsatmagan yuzlab boshqa yuqtirganlar bo‘lishi mumkinligi haqida ogohlantirgan.
25-avgust kuni BMT Falastinda poliomiyelitga qarshi vaksinatsiya o‘tkazishni rejalashtirayotgani, uning doirasida 640 mingdan ortiq bola emlanishi kutilayotgani haqida ma’lum qilgandi. Ushbu maqsadlar uchun 1,2 million doza vaksina G‘azoga yetkazilgan.
Isroil bosh vaziri Benyamin Netanyaxuning idorasi emlash o‘tkazish doirasida G‘azoda o‘t ochishni to‘xtatishga rozi bo‘lmaganliklarini aytgan.
30-avgust kuni JSSTning bosib olingan Falastin hududlari bo‘yicha vakili Richard Piperkorn G‘azoda o‘t ochishni to‘xtatmasdan turib, emlashni amalga oshirish mumkin emasligi haqida ogohlantirgan. U anklavdagi mojaro tomonlarini kampaniya davomida janglarni to‘xtatishga chaqirgan.
Izoh (0)