Isroil harbiylari 21-may kuni G‘arbiy Sohilga tashrif buyurgan xorijiy diplomatlarga qarata o‘t ochdi. Bu haqda CNN xabar berdi.
Hodisa Jenin qochqinlar lageri yaqinida yuz bergan, yevropalik va arab diplomatlarining katta delegatsiyasiga ogohlantiruvchi o‘q uzilgan.
20 dan ortiq davlat, jumladan, Buyuk Britaniya, Fransiya, Kanada va boshqa davlatlar delegatsiyalari qamaldagi lager atrofidagi gumanitar vaziyatni ko‘rish uchun rasmiy missiyada bo‘lgan, dedi Falastin ma’muriyati Tashqi ishlar vazirligi.
Vazirlik o‘t ochishni “qasddan va noqonuniy harakat” deb baholagan. Voqea aks etgan videodan Isroil askarlari yo‘lni to‘sib turgan darvozadan uzoqlashayotgan delegatsiyaga qarata o‘q uzganini ko‘rish mumkin. Delegatsiya a’zolaridan biri guruhni “devorga yaqin turinglar” deb ogohlantirgan va ular voqea joyidan uzoqlashgan.
Vazirlik Isroil bosqinchi hukumatiga ushbu jinoyatkorona hujum uchun to‘liq va bevosita javobgarlikni yuklaydi hamda bunday harakatlar jazosiz qolmasligini ta’kidlaydi, deyiladi Falastin TIV bayonotida.
Isroilning hodisa yuzasidan munosabati
Isroil mudofaa kuchlari guruh diplomatik delegatsiya ekani ma’lum bo‘lgach, dastlabki tergov boshlanganini ma’lum qildi.
Delegatsiya tasdiqlangan yo‘nalishdan chetga chiqib, ularga joylashish taqiqlangan hududga kirdi. Ushbu hududda harakat qilayotgan askarlar ularni uzoqlashtirish uchun ogohlantiruvchi o‘q uzdi, deyiladi Isroil bayonotida.
Shuningdek, Isroil dastlabki tergov natijalari bo‘yicha delegatsiyalar bilan bog‘lanishini va “yetkazilgan noqulayliklardan afsusda ekanini” aytdi.
BMT va Yevropa Ittifoqi buni qoraladi
BMTning G‘arbiy sohilda yordam ko‘rsatishni tashkil etish agentligi direktori Roland Fridrix Isroil harbiylari tomonidan taqdim etilgan voqealar versiyasini rad etdi. U mazkur tushuntirishlar “voqea jiddiyligini to‘liq aks ettirmasligini” ma’lum qildi.
Bu voqea Isroil xavfsizlik kuchlari tomonidan G‘arbiy sohilda muntazam ravishda qo‘llaniladigan va ko‘pincha o‘limga olib keladigan haddan tashqari kuch ishlatish haqida jiddiy ogohlantirish hisoblanadi. Bu holat, urush olib borish qoidalari qurolsiz fuqarolarga nisbatan qanday qo‘llanilayotgani to‘g‘risida jiddiy tashvish uyg‘otadi, dedi Roland Fridrix.
Yevropa diplomatiyasi rahbari Kaya Kallas hodisadan keyin “diplomatlar hayotiga har qanday tahdidlarni qabul qilib bo‘lmasligini” aytdi.
Biz Isroilni ushbu hodisani tergov qilishga, shuningdek, aybdorlarni javobgarlikka tortishga qat’iy chaqiramiz, dedi u.
Italiya, Ispaniya, Fransiya, Kanada tashqi ishlar vazirliklari Isroil elchilarini rasmiy tushuntirish berish uchun chaqirdi. Kanada bosh vaziri Mark Karni esa sodir bo‘lgan voqeani to‘liq va zudlik bilan tushuntirilishini kutayotganini aytdi.
Bu mutlaqo qabul qilib bo‘lmaydigan holat. Bu mintaqada sodir bo‘layotgan ko‘plab mutlaqo nomaqbul voqealarning faqatgina bir qismi, xolos, dedi u.
Irlandiya, Belgiya, Sloveniya, Portugaliya, Germaniya, Niderlandiya, Norvegiya, Daniya va Buyuk Britaniya vakillari qatori Yevropaning boshqa mamlakatlaridan ko‘plab rasmiy shaxslar otishmani qattiq qoraladi.
Bundan tashqari, Iordaniya, Misr, Turkiya va Qatar kabi davlatlarning tashqi ishlar vazirliklari ham ushbu hodisani keskin qoralayotganliklarini bildirdi.
Izoh (0)