Rossiyaning Krasnoyarsk shahridagi qurilishda 19-may kuni migrantlar o‘rtasida mushtlashuv yuz berdi. Unda Xitoy va O‘zbekiston ishchilari ishtirok etgani aytilmoqda.
Mushtlashuv oqibatida to‘rt nafar erkak tan jarohati olgani sababli yordam so‘rab murojaat qilgan. Politsiya bo‘limiga 25 kishi olib kelingan, ular mushtlashuvning faol ishtirokchilari hisoblanadi. Migrantlar o‘rtasidagi nizo maishiy sabablarga ko‘ra kelib chiqqani aytilmoqda. Mazkur holat yuzasidan “Qasddan badanga yengil shikast yetkazish” moddasi bilan jinoyat ishi qo‘zg‘atilgan.
Rossiyaning “112 Krasnoyarsk” Telegram kanaliga ko‘ra, mushtlashuvga Xitoyning “SiArSiSi Rus” (China Railway Construction Corporation Limited) qurilish kompaniyasida ishlaydigan Xitoy va O‘zbekiston fuqarolari o‘rtasidagi mojaro sabab bo‘lgan. Qurilish kompaniyasi holat yuzasidan izoh berishdan bosh tortgan.
So‘nggi oylarda Rossiyada qurilish va ta’mirlash vaqti o‘zbekistonliklar halok bo‘lishida oid bir nechta holat kuzatilgan. Jumladan, 13-yanvar kuni Sankt-Peterburg shahri Primorskiy tumanida o‘zbekistonlik quruvchi 16-qavatdan tushib ketgandi. 30 yoshli o‘zbekistonlik armaturachi hodisa oqibatida halok bo‘lgan.
19-fevral kuni Sankt Peterburg shahri Moskva tumanidagi qurilishda o‘zbekistonlik 24 yoshli ishchi demontaj qilayotganida 3,5 metrdan ortiq balandlikdan yiqilib, vafot etdi. Dastlabki ma’lumotlarga ko‘ra, bunga ishchining xavfsizlik texnikasi qoidalarini buzgani sabab bo‘lgan. Holat yuzasidan Tergov qo‘mitasi va Davlat mehnat inspeksiyasi tomonidan tekshiruvlar tashkil etilgan.
28-fevral kuni Sankt Peterburg shahridagi qurilish maydonchasida o‘zbekistonlik migrant halok bo‘lgandi. O‘zbekistondan kelgan 34 yoshli muhojir metro quruvchisi bo‘lib ishlagan. Erkak migratsiya ro‘yxatida turgan. Quruvchi ekskavator ishdan chiqqach, uni o‘zi ta’mirlashga uringan. Biroq ekskavator kovshi to‘g‘ridan to‘g‘ri uning ustiga tushib ketgandi.
Izoh (0)