Rossiya keskin demografik vaziyat fonida mamlakatni jadal rivojlantirish uchun turli davlatlardan kelgan mehnat migrantlariga muhtoj. Bu haqda Rossiya prezidenti matbuot kotibi Dmitriy Peskov “RIA Novosti”ga bergan intervyusida ma’lum qildi.
Migrantlar bu — ehtiyoj. Gap shundaki, bizning demografik vaziyatimiz juda murakkab. Biz dunyodagi eng katta mamlakatda yashaymiz, ammo aholimiz kam. Albatta, dinamik rivojlanishimiz va barcha taraqqiyot rejalarimizni amalga oshirishimiz uchun ishchi kuchiga ehtiyojimiz bor. Biz ularni faqat xush ko‘ramiz, dedi u.
Peskovning ta’kidlashicha, migratsiyani “xuddi ishchi migrantlarni qabul qiladigan ko‘plab mamlakatlardagi kabi yetarlicha qat’iy tartibga solish va yo‘lga qo‘yish kerak”.
Shuningdek, biz migrantlar orasidagi jinoyatchilikdan himoya qiladigan aniq, qat’iy, ammo qulay qoidalarni ishlab chiqishimiz zarur, dedi Kreml vakili.
Noyabr oyi boshida Rossiya prezidenti Vladimir Putin Rossiya hukumati migrantlarni jalb qilish masalalarida birinchi navbatda Rossiya fuqarolari manfaatlarini hisobga olishi kerakligini aytgandi. U Rossiyaga ishlash uchun kelgan xorijliklar agar rus tilini yaxshi bilsa, rus an’analarini hurmat qilsa va qonunchilikka rioya etsa, salbiy munosabatga duch kelmasligini bildirgan.
Izoh (0)