Rossiyadagi noqonuniy migrantlar 30-aprelgacha mustaqil ravishda mamlakatni tark etishi yoki o‘z huquqiy holatini tartibga solishi kerak. Rossiya prezidenti Vladimir Putinning noqonuniy migrantlarni chiqarib yuborish to‘g‘risidagi qonunni rivojlantirish maqsadida imzolagan farmonida bu haqda so‘z boradi.
Rossiyadan migratsiya rejimi bo‘yicha chiqarib yuborish 2025-yil 5-fevraldan boshlab joriy etiladi. U Rossiyada qonuniy asosda bo‘lish huquqiga ega bo‘lmagan xorijliklarga nisbatan qo‘llaniladi. Ushbu toifaga kiruvchi barcha fuqarolar chiqarib yuborilgunga qadar yoki huquqiy holati tartibga solinguncha nazorat qilinadigan shaxslar reyestriga kiritilishi shart.
Istisno holatlar
Chiqib ketish talabi qonuniy asosda qolishni istagan va quyidagi shartlarga javob beradigan xorijliklarga nisbatan qo‘llanilmaydi: biometrik ma’lumotlarni topshirgan, giyohvand moddalar va yuqumli kasalliklar bo‘yicha testdan o‘tgan, rus tili, Rossiya tarixi va qonunlarini bilishi to‘g‘risidagi hujjatlarni taqdim etgan, qarzlarini to‘lagan bo‘lsa. Bunda patent, ishlash yoki vaqtincha hamda doimiy yashash guvohnomasini bekor qilish uchun asoslar bo‘lmasligi kerak.
Urushga yollanganlarga imtiyozlar beriladi
Rossiya armiyasi yoki harbiy tuzilmalarida xizmat qilish uchun shartnoma tuzgan xorijliklar uchun imtiyozlar berilgan. Ularga nisbatan “oldin qabul qilingan deportatsiya, readmissiya, Rossiyaga kirishga ruxsat bermaslik, Rossiyada bo‘lishning nomaqbulligi, vaqtincha bo‘lish muddatini qisqartirish to‘g‘risidagi qarorlar o‘z kuchini yo‘qotadi va ijro etilmaydi”.
Ma’lumot o‘rnida, O‘zbekiston fuqarolariga chet davlatlarining harbiy xizmatiga yollanish qonunan taqiqlanadi!
Izoh (0)