Россиянинг Красноярск шаҳридаги қурилишда 19 май куни мигрантлар ўртасида муштлашув юз берди. Унда Хитой ва Ўзбекистон ишчилари иштирок этгани айтилмоқда.
Муштлашув оқибатида тўрт нафар эркак тан жароҳати олгани сабабли ёрдам сўраб мурожаат қилган. Полиция бўлимига 25 киши олиб келинган, улар муштлашувнинг фаол иштирокчилари ҳисобланади. Мигрантлар ўртасидаги низо маиший сабабларга кўра келиб чиққани айтилмоқда. Мазкур ҳолат юзасидан “Қасддан баданга енгил шикаст етказиш” моддаси билан жиноят иши қўзғатилган.
Россиянинг “112 Красноярск” Telegram каналига кўра, муштлашувга Хитойнинг “СиАрСиСи Рус” (Chinа Railway Construction Corporation Limited) қурилиш компаниясида ишлайдиган Хитой ва Ўзбекистон фуқаролари ўртасидаги можаро сабаб бўлган. Қурилиш компанияси ҳолат юзасидан изоҳ беришдан бош тортган.
Сўнгги ойларда Россияда қурилиш ва таъмирлаш вақти ўзбекистонликлар ҳалок бўлишида оид бир нечта ҳолат кузатилган. Жумладан, 13 январь куни Санкт-Петербург шаҳри Приморский туманида ўзбекистонлик қурувчи 16-қаватдан тушиб кетганди. 30 ёшли ўзбекистонлик арматурачи ҳодиса оқибатида ҳалок бўлган.
19 февраль куни Санкт Петербург шаҳри Москва туманидаги қурилишда ўзбекистонлик 24 ёшли ишчи демонтаж қилаётганида 3,5 метрдан ортиқ баландликдан йиқилиб, вафот этди. Дастлабки маълумотларга кўра, бунга ишчининг хавфсизлик техникаси қоидаларини бузгани сабаб бўлган. Ҳолат юзасидан Тергов қўмитаси ва Давлат меҳнат инспекцияси томонидан текширувлар ташкил этилган.
28 февраль куни Санкт Петербург шаҳридаги қурилиш майдончасида ўзбекистонлик мигрант ҳалок бўлганди. Ўзбекистондан келган 34 ёшли муҳожир метро қурувчиси бўлиб ишлаган. Эркак миграция рўйхатида турган. Қурувчи экскаватор ишдан чиққач, уни ўзи таъмирлашга уринган. Бироқ экскаватор ковши тўғридан тўғри унинг устига тушиб кетганди.
Изоҳ (0)