Rossiya Davlat dumasi birinchi o‘qishda migrantlar farzandlarini maktabga qabul qilishda rus tilini bilish uchun majburiy testdan o‘tkazishni nazarda tutuvchi qonun loyihasini bir ovozdan ma’qulladi.
Qonun loyihasi yakuniy ma’qullangan taqdirda “Ta’lim to‘g‘risida”gi qonunning 78-moddasi o‘zgartiriladi. Loyihaga ko‘ra, test sinovlaridan muvaffaqiyatli o‘ta olmaydigan bolalar o‘qishga qo‘yilmaydi.
Shuningdek, Rossiya hududida noqonuniy ravishda bo‘lganlar maktabga qabul qilinmaydi — qabul paytida qonuniy bo‘lib turganligini tasdiqlovchi hujjat talab qilinadi.
“Qonun loyihasi “Rossiya fuqarolarining ta’lim olish huquqlarini himoya qilishni ta’minlaydi, shuningdek, uning qulayligi va sifatini kafolatlaydi”, deya ta’kidladi Duma vitse-spikeri va qonun loyihasi muallifi Irina Yarova.
U, agar bola testdan o‘ta olmasa, ota-onalar keyinroq, bola tilni yaxshiroq o‘zlashtirgach, maktabga qabul qilish uchun ariza bilan murojaat qilishlari mumkinligini aytgan. Yarova ta’lim ochiq va bepul bo‘lib qolayotgani sababli, tuzatishlar xalqaro kelishuvlarga to‘liq mos kelishiga ishonch bildirgan.
“Maktab maktabga tayyorgarlik bilan emas, balki ta’lim berish bilan shug‘ullanadi”, deya qo‘shimcha qilgan deputat.
Davlat dumasining oilani himoya qilish, otalik, onalik va bolalik masalalari qo‘mitasi a’zosi Tatyana Larionova qonun loyihasi muhokamasi chog‘ida ishlash uchun kelgan barcha ota-onalar ham farzandlariga rus tilini o‘qitish uchun to‘lov masalasini hal qila olmasligini ta’kidlagan.
“Ta’lim muassasalariga qabul qilinmagan bolalarni o‘z holiga tashlab qo‘yib, ularni ko‘cha-ko‘yga mahkum etmayapmizmi? Bu bilan huquqbuzarliklar va o‘smirlar jinoyatchiligi o‘sishi uchun sharoit yaratib qo‘ymayapmizmi?”, deya Yarovaga savol berdi u.
Shuningdek, Larionova ikkinchi o‘qishga migrantlarni moslashtirish va integratsiya qilish dasturlarini amalga oshirish samaradorligini oshirish bo‘yicha chora-tadbirlarni ko‘zda tutishni taklif etdi.
Yarovaya bunga javoban, mehnat muhojirlarining Rossiyaga voyaga yetmagan bolalarini olib kelishlari shart emasligini qayd etdi.
“Rus tilini bilmaydiganlarni ta’lim olish uchun bir sinfga kiritmaslik kerak, chunki ularning mavjudligi rossiyalik bolalarimizga dasturlarni to‘liq o‘zlashtirishga imkon bermaydi. Biz o‘z bolalarimiz, rossiyalik bolalar haqida o‘ylashimiz kerak. O‘qishga tayyormisiz? Marhamat, test topshiring va o‘qing”, deydi qonun loyihasi mualliflaridan biri.
Deputatning ta’kidlashicha, bolalarning rus tilida ta’lim olishga tayyorligi uchun javobgarlik ularning ota-onalari zimmasida. Uning fikricha, agar bolalar til bilish bo‘yicha testdan o‘ta olmasa, rus tilini keyingi o‘rganish bepul emas, balki muhojirlar hisobidan bo‘lishi kerak.
Davlat dumasiga, shuningdek, Rossiyadagi barcha maktab va kasb-hunar ta’limini muhojirlar uchun pullik qilishni taklif etuvchi qonun loyihasi ham kiritilgan.
Izoh (0)