Xitoyning Fenyan uyezdida (Anxoy viloyati) 650 yildan ortiq tarixga ega bo‘lgan qadimiy nog‘ora minorasining tom qismi qulab tushdi. Hodisa natijasida hech kim jarohat olmagan, voqea yuzasidan tergov olib borilmoqda. Bu haqda Global Times xabar bermoqda.
Voqea 19-may kuni kechqurun yuz bergan. Qadimiy nog‘ora minorasining sharqiy tomonidagi cherepitsa qulab tushgan. Tomning qulashi videoga tushirilib, Xitoy ijtimoiy tarmoqlarida tez tarqaldi. Tasvirlarda ko‘rinishicha, tomning plitkasi avval sekin sirg‘ana boshlaydi, so‘ngra gumburlab yerga qulaydi va havoga chang ko‘tariladi. Ertasi kuniyoq “Fenyan minorasi quladi” xeshtegi Weibo ijtimoiy tarmog‘ida eng ko‘p muhokama qilingan mavzuga aylandi.
Fenyan hokimiyati voqeani tasdiqlab, tafsilotlarni e’lon qilgan. Ularning aytishicha, hodisa sodir bo‘lishi bilan yaqin atrofdagi barcha odamlar darhol xavfsiz joyga ko‘chirilgan, voqea joyi o‘rab olingan. Joyga qurilish va loyihalash tashkilotlari vakillari yetib keldi, tergovga mustaqil ekspertlar ham jalb qilingan.
Fenyan nog‘ora minorasi 1375-yilda — Min sulolasi davrida qurilgan. XIX asr o‘rtalarida binoning eng qadimiy qismi qulab tushgan, keyinchalik u qayta tiklangan. Minora 1995-yilda hozirgi ko‘rinishiga keltirilgan. 2017-yildan beri tomdagi cherepitsa vaqti-vaqti bilan ko‘chib tushayotgan edi. 2023-yil sentyabr oyida boshlangan kapital ta’mirlash ishlari 2024-yil mart oyida yakunlangan.
Hozirda minora noma’lum muddatga — ta’mirlash ishlari tugagunga qadar vaqtincha yopilgan.
Izoh (0)