Koronavirus bilan kasallanish holatlari butun janubi-sharqiy Osiyoda, ayniqsa Xitoyning maxsus ma’muriy hududi Gonkong va Singapurda tez sur’atlar bilan ko‘paymoqda. Bu haqda The Independent xabar berdi.
Gonkong sog‘liqni saqlash vakillari kasallanish holatlari soni keskin oshganini ma’lum qilgan. Epidemiyaning yangi to‘lqini boshlangani ta’kidlanmoqda. Kasallanish darajasi mart oyi o‘rtalarida 1,7 foizdan hozirda 11,4 foizgacha ko‘tarilib, 2024-yil avgust oyida qayd etilgan eng yuqori ko‘rsatkichdan oshgan.
Markazning yuqumli kasalliklar bo‘limi boshlig‘i Albert Au aytishicha, Gonkongda hozirda COVID-19 virusining faolligi “ancha yuqori” darajadadir.
Singapurda Sog‘liqni saqlash vazirligi bir yil ichida ilk bor COVID-19 bilan kasallanish bo‘yicha hisobotni e’lon qildi. Unda 3-mayda yakunlangan haftada oldingi 7 kun bilan solishtirganda kasallanish holatlari soni 28 foizga oshib, 14 200 taga yetgani ma’lum qilingan. Sog‘liqni saqlash vazirligi va yuqumli kasalliklar agentligi kasallanishning o‘sishini diqqat bilan kuzatayotganini bildirgan. Kunlik kasalxonaga yotqizilganlar soni taxminan 30 foizga oshgan.
Mamlakatda aylanib yurgan virus turlari avvalgilariga qaraganda yuqumliroq yoki kasallikning og‘irroq kechishiga sabab bo‘layotganiga hech qanday dalil yo‘q, deyiladi vazirlik bayonotida.
Idoraning baholashicha, kasallanishning ko‘payishi immunitetning susayishi bilan bog‘liqdir. Singapur koronavirus bilan kasallanish holatlari to‘g‘risidagi ma’lumotlarni faqat sezilarli darajada ko‘paygandagina e’lon qiladi. Shuningdek, Xitoy va Tailandda ham kasallanishning o‘sishi kuzatilayotgani ma’lum qilinmoqda. Xitoyda infeksiyalar o‘tgan yozdagi eng yuqori ko‘rsatkichga yaqinlashmoqda.
Izoh (0)