AQSH prezidenti Donald Tramp hokimiyatga kelganidan so‘ng AQSHning dunyo bo‘ylab obro‘si pasaymoqda. Bu haqda Politico 2025-yil uchun “Demokratiyani idrok etish indeksi” ma’lumotlariga asoslanib xabar bermoqda.
“So‘rovda ishtirok etganlarning ko‘pchiligi AQSHga nisbatan umuman salbiy munosabatda ekanini bildirgan. Bu esa o‘tgan yilga nisbatan [obro‘ning] keskin tushib ketganini ko‘rsatadi”, deyiladi nashrda.
Tadqiqot 100 mamlakatdan 110 mingdan ortiq respondent ishtirokida o‘tkazilib, demokratiya, geosiyosiy masalalar va global kuchlarni idrok etishga bag‘ishlangan.
DPI ma’lumotlariga ko‘ra, AQSH obro‘si, ayniqsa, Yevropa Ittifoqi (YI) aholisi orasida pasaygan. NATOning sobiq bosh kotibi, tadqiqot mualliflaridan biri Anders Fog Rasmussen “Qo‘shma Shtatlar haqidagi tasavvurlar bu qadar keskin pasayib ketganidan hayratda emasman”, deb ta’kidladi.
Tadqiqot natijalariga ko‘ra, Xitoy dunyo miqyosidagi obro‘ bo‘yicha birinchi marta AQSHdan o‘zib ketdi. Bundan tashqari, Rossiyaning obro‘si asta-sekin oshib bormoqda. Alohida yetakchilarning obro‘siga kelsak, AQSH prezidenti Donald Tramp 27 foiz ijobiy baho olgan bo‘lsa, uning rossiyalik hamkasbi Vladimir Putinning siyosatini respondentlarning 32 foizi ijobiy baholagan. XXR raisi Si Szinpinni qo‘llab-quvvatlash darajasi ham 32 foizni tashkil etgan.
Izoh (0)