Prezident O‘zbekistonliklar AQSHga kirishi uchun viza talablarini yengillashtirish choralarini ko‘rishni topshirdi.
Davlat rahbarining “2025—2026-yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida”gi farmonida belgilanishicha, TIV 3 oy muddatda AQSH fuqarolari uchun O‘zbekistonga 30 kunlik muddatga vizasiz kirish rejimini joriy qilish hamda O‘zbekiston fuqarolariga AQSHga kirish uchun viza talablarini yengillashtirish yuzasidan muzokaralar boshlash va yakuni bo‘yicha taklif kiritishi lozim.
Shuningdek, Rossiya, Qozog‘iston va Ozarbayjon fuqarolari uchun O‘zbekistonga ichki hujjat yoki ID-karta, shu jumladan, 16 yoshga to‘lmagan fuqarolarga “kinder pasport” bilan 30 kungacha kirish rejimini joriy qilish rejalashtirilgan.
Prezident farmoni bilan 2025-yil 1-iyundan Bahrayn, Kuvayt va Ummon fuqarolari uchun 30 kunlik vizasiz rejim joriy etiladi. Hujjatga ko‘ra, respublika hududlariga 15,8 million nafar xorijiy turistlarning safarlarini tashkil etish, turizm xizmatlari eksportini 4 mlrd dollarga yetkazish maqsad qilingan.
1-iyundan boshlab O‘zbekiston va Xitoy o‘rtasida o‘zaro vizasiz rejim ham joriy etiladi. Bu kelishuv ikki davlat fuqarolariga 30 kungacha vizasiz sayohat qilish imkonini beradi.
Izoh (0)