Хитойнинг Фенян уездида (Анхой вилояти) 650 йилдан ортиқ тарихга эга бўлган қадимий ноғора минорасининг том қисми қулаб тушди. Ҳодиса натижасида ҳеч ким жароҳат олмаган, воқеа юзасидан тергов олиб борилмоқда. Бу ҳақда Global Times хабар бермоқда.
Воқеа 19 май куни кечқурун юз берган. Қадимий ноғора минорасининг шарқий томонидаги черепица қулаб тушган. Томнинг қулаши видеога туширилиб, Хитой ижтимоий тармоқларида тез тарқалди. Тасвирларда кўринишича, томнинг плиткаси аввал секин сирғана бошлайди, сўнгра гумбурлаб ерга қулайди ва ҳавога чанг кўтарилади. Эртаси куниёқ “Фенян минораси қулади” хештеги Weibo ижтимоий тармоғида энг кўп муҳокама қилинган мавзуга айланди.
Фенян ҳокимияти воқеани тасдиқлаб, тафсилотларни эълон қилган. Уларнинг айтишича, ҳодиса содир бўлиши билан яқин атрофдаги барча одамлар дарҳол хавфсиз жойга кўчирилган, воқеа жойи ўраб олинган. Жойга қурилиш ва лойиҳалаш ташкилотлари вакиллари етиб келди, терговга мустақил экспертлар ҳам жалб қилинган.
Фенян ноғора минораси 1375 йилда — Мин сулоласи даврида қурилган. ХIX аср ўрталарида бинонинг энг қадимий қисми қулаб тушган, кейинчалик у қайта тикланган. Минора 1995 йилда ҳозирги кўринишига келтирилган. 2017 йилдан бери томдаги черепица вақти-вақти билан кўчиб тушаётган эди. 2023 йил сентябрь ойида бошланган капитал таъмирлаш ишлари 2024 йил март ойида якунланган.
Ҳозирда минора номаълум муддатга — таъмирлаш ишлари тугагунга қадар вақтинча ёпилган.
Изоҳ (0)