Xitoyda ishlab chiqarilgan quyosh energiyasi invertorlarida noma’lum aloqa uskunalari topilgan. Bu haqda AQSH energetika rasmiylariga tayanib Fox News xabar berdi.
Xavfsizlikni tekshirish maqsadida darhol uskunalar yechib olingan.
Xitoyda ishlab chiqariladigan quvvat invertorlari butun dunyoda quyosh panellari va shamol turbinalarini elektr tarmoqlariga ulash uchun ishlatiladi. Ular akkumulyatorlar, issiqlik nasoslari va elektr transport vositalarini zaryadlashda ham qo‘llanadi.
Bu kabi invertorlardan foydalanadigan kommunal kompaniyalar odatda Xitoydan xavfsiragan holda xavfsizlik devorlari o‘rnatadi. Bu devorlar ma’lumotlar tashqariga chiqishining oldini oladi.
So‘nggi to‘qqiz oy ichida bir nechta xitoylik yetkazib beruvchilarning batareyalarida hujjatsiz aloqa qurilmalari, jumladan, uyali radiolar ham topilgani ma’lum qilingan.
“Xitoy bizning infratuzilmalarimizni vayron qilish yoki xavf ostiga qo‘yishdan manfaatdor. Menimcha, xitoyliklar invertorlardan keng foydalanish G‘arbning xavfsizlik muammosini yanada kuchaytiradi deb o‘ylaydi”, dedi AQSH Milliy xavfsizlik agentligining sobiq direktori Mayk Rojers.
Bunga javoban Xitoyning Vashingtondagi elchixonasi vakili shunday dedi: “Xitoyning infratuzilma yutuqlari buzib ko‘rsatilishi va qoralanishiga qarshimiz.”
Ekspertlarning fikricha, invertorlarni masofadan o‘chirish yoki ularning sozlamalarini o‘zgartirish uchun yolg‘on aloqa vositalaridan foydalanish elektr tarmoqlarini beqarorlashtirishi, energiya infratuzilmasiga zarar yetkazishi va keng ko‘lamli elektr ta’minoti uzilishiga olib kelishi mumkin.
Bu kabi yashirin firibgarlik qurilmalari mavjudligi haqida AQSH hukumati ilgari xabar bermagan. AQSH Energetika vazirligidan izoh so‘ralganda, ular rivojlanayotgan texnologiyalar bilan bog‘liq xavflarni doimiy ravishda o‘rganib kelayotganini hamda ularni hujjatlashtirishda jiddiy qiyinchiliklarga duch kelayotganini ta’kidlagan. AQSH va Xitoy o‘rtasidagi ziddiyat kuchayib borar ekan, Qo‘shma Shtatlar va boshqa mamlakatlar Xitoyning strategik infratuzilmadagi rolini qayta ko‘rib chiqmoqda.
“Xitoy Kommunistik partiyasi bizga, haqiqatan, tahdid qilmoqda va bu tobora o‘sib bormoqda. Ular bizning muhim infratuzilmalarimizni nishonga olish uchun hech narsadan tap tortmaydi”, dedi AQSH Kongressi Vakillar palatasi a’zosi Avgust Pflyuger.
2025-yilning fevral oyida AQSH 2027-yil oktyabr oyidan boshlab milliy xavfsizlik nuqtayi nazaridan Xitoyning ba’zi kompaniyalaridan batareyalar sotib olishni taqiqlovchi “Xorijiy dushman batareyalariga qaramlikdan xalos bo‘lish to‘g‘risida”gi qonunni qabul qilgan edi. Qonun loyihasi 11-mart kuni Senatning Ichki xavfsizlik va hukumat masalalari qo‘mitasiga yuborilgan va haligacha qabul qilinmagan.
Unga ko‘ra, Xitoy Kommunistik partiyasi bilan chambarchas bog‘liq bo‘lgan oltita Xitoy kompaniyasi: Contemporary Amperex Technology Company, BYD Company, Envision Energy, EVE Energy Company, Hithium Energy Storage Technology Company, va Gotion High-tech Company’dan batareyalar sotib olish taqiqlangan. Bundan tashqari, AQSH 2019-yildan beri Huawei’ning mamlakatga kirishini cheklab, kompaniyani milliy xavfsizlikka zid faoliyatda ayblagan. Huawei esa buni rad etgan.
Izoh (0)