Ijtimoiy tarmoqlarda Olmaliq shahridagi 6-sonli davlat maktabgacha ta’lim muassasasida bolaning ustiga qaynoq suv to‘kilgani aytilgan video tarqaldi. Holat yuzasidan viloyat MMTB ma’lumot berdi.
Unga ko‘ra muassasada 5-mart kuni soat kunduzgi 12:00 lar atrofida bolalar qarovsiz qolishi natijasida bir nafar bolaning ustiga qaynoq suv to‘kilgan. Natijada bolakayning bel sohasida 3 darajali kuyish qayd etilgan.
Ma’lum bo‘lishicha, bola dastlab tez tibbiy yordamga olib borilib, tibbiy tekshiruvlardan o‘tgan. Shifoxona rasmiylari holatni aniqlab, 102 ga murojaat qilgan. Bu vaziyatda II tomonidan o‘rganish olib borish uchun harakat olib borilganda, bolaning onasi hech kimga, kimga hech qanday da’vosi yo‘qligini ta’kidlaganligi sababli tomonlar kelishuvi bilan ish yopilgan.
Ammo ona mazkur muassasada bu kabi noxush holatlar tugatilish o‘rniga avj olayotgani, bolalarga munosabat juda yomon ekanligini ko‘rib, mazkur holat va boshqa vaziyatlar bo‘yicha 14-may kuni ijtimoiy tarmoqlarda chiqish qiladi.
Ayni paytda ushbu holat Toshkent viloyati Maktabgacha va maktab ta’limi boshqarmasi tomonidan nazoratga olingan. Ishchi guruh tuzilib, vaziyat to‘laligicha o‘rganib chiqildi. Barcha hujjatlar rasmiylashtirilib, huquqni muhofaza qiluvchi organlarga topshirilgan.
Bog‘chalardagi voqealar
2025-yil 3-aprel kuni Samarqand viloyati Payariq tumanidagi bog‘chada bolalarga qo‘pol munosabatda bo‘lgan tarbiyachi ishdan olingani ma’lum qilindi. 27-mart kuni Toshkent viloyatidagi bog‘chada ham bolalarga qo‘pollik qilib kelgan tarbiyachi ishdan olingandi. 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi.
28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi.
6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.
Izoh (0)