Rossiyada ota-ona qaramog‘isiz qolgan 15 nafar bola 15-dekabr kuni O‘zbekistonga qaytarildi. Bu haqda Ijtimoiy himoya milliy agentligi xabar qildi.
Dekabr oyi boshlarida agentlik IIV, SSV xodimlari bilan hamkorlikda Rossiyaning 6 ta hududida joylashgan 10 nafar bolani vatanga qaytarish bo‘yicha ishlarni boshlagan edi. O‘rganishlar jarayonida yana 5 nafar bola ota-ona qaramog‘idan mahrum bo‘lgani aniqlandi.
Ularning barchasi O‘zbekistonga qaytarildi. O‘z oilalariga qaytarilishiga qadar bolalarning 10 nafari Voyaga yetmaganlarga ijtimoiy huquqiy yordam ko‘rsatish markaziga, qolgan 5 nafari esa vaqtinchalik Toshkent shahridagi bolalar uyiga joylashtirildi.
Bolalar qaytarilgach, mutasaddi xodimlar ularning oilaviy muhiti va bolaning holatini muntazam monitoring qiladi va zaruriyat tug‘ilganda ijtimoiy xizmatlar biriktiradi.
Bundan avval Rossiyaning Sverdlovsk viloyatida qiyin ahvolda qolgan bir oilaning besh nafar a’zosi O‘zbekistonga qaytarilgani haqida xabar berilgan edi.
Xorijdan O‘zbekistonga qaytarilgan fuqarolar
Avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi. O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi.
Izoh (0)