Oilaviy kechalar unutilmas bo‘lishining eng yaxshi usullaridan biri farzandlar bilan birga yaxshi film tomosha qilishdir. Bunday vaqtni mazmunli o‘tkazish, bolalar bilan yangi mavzularda suhbat qurish hamda ularga yangi saboq berish uchun quyida biz to‘plagan filmlar yordam beradi.
“Tom Soyer”
Mark Tvenning “Tom Soyerning sarguzashtlari” romani 2026-yilda nashr etilganiga 150 yil to‘ladi. Dunyo va zamon uzoq vaqt davomida keskin o‘zgarib ketganiga qaramay, asar hanuz dolzarbligini yo‘qotmagan. Asardagi bosh qahramonlar taxminan 10–12 yoshli o‘smirlar — Tom Soyer va Gek Finn. Ular elektron gadjetsiz, bolalarga xos sarguzashtlarga to‘la hayot kechiradi.
Bugungi kun mezonlariga ko‘ra, filmdagi ayrim sahnalar, masalan, bolani savalash kadrlari bugungi tarbiya tamoyillariga mos kelmasligi mumkin. Ammo bu orqali Tom har doim bajargan ishlari uchun javobgarlikni o‘z zimmasiga olishi ko‘rsatiladi. Bu esa zamonaviy bolalarda yetishmaydigan muhim jihatlardan biridir.
“Tom Soyerning sarguzashtlari” turli mamlakatlarda bir necha bor ekranlashtirilgan, masalan, rus kinosi ishqibozlari uchun 1981-yilda suratga olingan uch qismli film (bosh rollarda Fyodor Stukov va Vladislav Galkin)ni tavsiya etish mumkin. Amerika filmlarini yoqtiruvchilar esa 1973-yilda suratga olingan versiyani tomosha qilishlari mumkin. Shuningdek, 2011-yilda Germaniyada ishlangan film ham bor. Unda Tom rolini yosh aktyor Luis Xofmann gavdalantirgan.
“Enni”
“Enni” musiqiy filmining bosh qahramoni o‘n yoshli qizaloq bo‘lib, u spirtli ichimlikka mukkasidan ketgan miss Xannigan (Kameron Dias ijrosida) boshchiligidagi bolalar uyida tarbiyalanadi. Enni haqiqiy ota-onasini topish umidida yashaydi, ammo taqdir uni Nyu York meri lavozimiga nomzod bo‘lgan Uill Staks (Jeymi Foks) bilan uchrashtiradi. Staks qizaloqni mashina urib ketishidan so‘nggi daqiqada qutqarib qolgan video internetda tarqaladi. Uning jamoasi Enni orqali PR kampaniya o‘tkazmoqchi bo‘ladi, ammo quvnoq va sho‘x qizaloq Enni ularning hayotini butkul o‘zgartirib yuboradi.
“Terabitiya mamlakati sari”
Gabor Chuponing “Terabitiyaga mamlakati sari” nomli fantastik dramasi beshinchi sinf o‘quvchisi Jess Aaron haqida hikoya qiladi. U kamgap, tortinchoq bola. Jessning na do‘stlari bor, na biror qiziqishi. U ota-onasi bilan ham yaxshi til topishmaydi. Bir kuni u qo‘shni qiz Lesli (Anna-Sofiya Robb) bilan tanishadi va ular do‘st tutinadi. Birgalikda ular “Terabitiya” deb nomlangan sehrli olamni kashf qiladi. Bu dunyo ularning haqiqiy hayotdagi hissiyotlarini aks ettiradi. Ammo Leslining kutilmagan o‘limi bu go‘zal ertakka yakun yasaydi. Shunga qaramay, Jess bu do‘stlik orqali ancha ulg‘ayadi va xarakterini o‘zgartiradi.
“Ulg‘aygan”
1988-yilda rejissyor Penni Marshall tomonidan suratga olingan “Ulg‘aygan” filmi ajoyib oilaviy dramadir. Bosh rolni aktyor Tom Henks ijro etgan. Bu roli uchun u “Oltin globus” mukofotiga sazovor bo‘lgan, shuningdek, “Oskar” nominatsiyasini ham qo‘lga kiritgan.
Filmda 13 yoshli Joshua Baskin tezroq katta bo‘lishni orzu qiladi va ertasi kuni uyg‘onganida o‘zini 30 yoshli erkak tanasida topadi. Uning kattalarga xos hayoti yomon bo‘lmaydi: Joshua o‘yinchoqlar ishlab chiqaradigan kompaniyada ishlaydi, yaxshi maosh oladi, hashamatli kvartirada yashaydi. Ammo uning qalbi hanuz bolalik sog‘inchi bilan to‘lib-toshadi.
“Mening qattiqqo‘l enagam”
Aktrisa, rejissyor va ssenarist Emma Tompson “Mening qattiqqo‘l enagam” filmining ssenariysi ustida to‘qqiz yil davomida ishlagan va unda bosh rolni o‘zi ijro etgan. 2005-yilda ekranlarga chiqqan film yaxshi daromad ko‘rgan va tanqidchilar tomonidan iliq kutib olingan. Shu sababli besh yildan so‘ng uning ikkinchi qismi ham suratga olingan.
Voqealar Viktoriya davridagi Angliyada kechadi. Film markazida o‘z rafiqasidan ajralgan janob Braun (Kolin Firt) va uning yetti nafar nihoyatda sho‘x farzandlari turadi. Bolalar ustidan nazoratni yo‘qotgan Braun uyiga birdaniga enaga MakFi taklif etiladi. U bolalarning o‘jarligini ijobiy energiyaga aylantira oladi.
Izoh (0)