Rossiya armiyasi aprel oyi boshidan beri Ukrainaga qarshi 2800 ga yaqin aviatsiya bombasi, 1400 dan ortiq zarba beruvchi uchuvchisiz uchish apparati va 60 ga yaqin turli xildagi raketalar, shu jumladan ballistik raketalarni qo‘llagan. Bu haqda Ukraina prezidenti Vladimir Zelenskiy Meta ijtimoiy tarmog‘ida ma’lum qildi.
“Rossiya terrori har kuni va har kecha davom etmoqda. Faqatgina aprel oyining boshidan beri Rossiya armiyasi allaqachon 2800 ga yaqin aviatsiya bombasi, 1400 dan ortiq zarba beruvchi uchuvchisiz uchish apparatini qo‘llagan va ularning aksariyati “Shahed”, shuningdek, turli xildagi 60 ga yaqin raketa, shu jumladan ballistik raketalarni ishlatgan”, deya ta’kidladi Zelenskiy.
Ukraina prezidentining aytishicha, hozirda Sumida kechagi Rossiyaning ballistik raketalar bilan qilgan hujumidan so‘ng 38 kishi, jumladan to‘qqiz nafar bola tibbiyot muassasalarida davolanmoqda.
“11 kishi, ulardan 3 nafari bolalar, og‘ir ahvolda. Ularga iloji boricha ko‘proq yordam ko‘rsatish uchun barcha choralar ko‘rilmoqda. Faqat kechagi hujumning o‘zida 34 kishi halok bo‘ldi, 119 kishi yaralandi. Afsuski, ikki nafar bola vafot etdi, 15 nafari jarohatlandi”, deydi Ukraina prezidenti.
Bundan tashqari, Odessada tungi “shahid” hujumi paytida yetti kishi jarohat olgan. Shuningdek, rossiyaliklar shu kecha Slavyansk, Uman, Xarkov, Berislav va boshqa shahar hamda qishloqlarni o‘qqa tutgan.
“Faqatgina Rossiyaga haqiqiy bosim o‘tkazish orqali buni to‘xtatish mumkin. Rossiyaning qotillik mashinasini moliyalashtiruvchi sektorlarga nisbatan ta’sirchan sanksiya choralari ko‘rilishi zarur. Urush olib kelgan tomon to‘xtashi va qilmishlari uchun javob berishi kerak - bu adolatli yo‘l”, deya yakunlagan prezident.
Ukraina prezidenti Vladimir Zelenskiy amerikalik hamkasbi Donald Trampni “tinchlik rejasi”ni amalga oshirishdan oldin Ukrainaga kelishga chaqirgandi.
Izoh (0)