Toshkent shahrida “B.S” MCHJga qarashli savdo shoxobchalarda tegishli hujjatlari bo‘lmagan turli nomdagi tamaki va elektron tamaki mahsulotlari sotuvga qo‘yilganligi aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ushbu savdo nuqtalaridan umumiy bahosi qariyb 12 mlrd so‘mlik 144 567 quti tamaki, shundan 56 225 dona elektron tamaki, 25 714 dona elektron tamaki suyuqliklari, 10 668 dona elektron tamaki chekish uskunasi hamda 3 800 dona kalyan ashyoviy dalil sifatida olingan.
Ushbu tamaki mahsulotlarining kelib chiqish manbasini aniqlash maqsadida davom etgan tezkor tadbirda, Toshkent viloyatining Qibray tumani, “Xaydarobod” MFY hududidagi noturar binoda 3 nafar fuqaro elektron tamaki mahsulotlarini ishlab chiqaruvchi yashirin sex tashkil etgani fosh etildi.
Sex ko‘zdan kechirilganda, umumiy bahosi 500 mln so‘mlik yaʼni 2 175 dona elektron tamaki suyuqliklari, 2 dona 250 kilogrammlik idishda glitserin va glikol kislotasiga o‘xshash suyuqliklar, turli nomdagi 42 ta o‘ramda elektron tamaki yorliqlari, elektron tarozi, turli hajmdagi o‘lchov idishlari, hush bo‘y taʼm beruvchi aromatizatorlar, qadoqlash uskunalari, 567 dona tayyor elektron tamaki va ishlab chiqarishda foydalanilgan boshqa tovar moddiy boyliklari ashyoviy dalil sifatida olingan.
Mazkur holat yuzasidan Jinoyat kodeksining 179-moddasi (soxta tadbirkorlik) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda muomalaga kiritish yoki ishlab chiqarish) bilan jinoyat ishi qo‘zg‘atilib, tergov harakatlari o‘tkazilmoqda.
Senat 2022-yilning iyunida bo‘lib o‘tgan yalpi majlisida “Alkogol va tamaki mahsulotlarining tarqatilishini hamda iste’mol qilinishini cheklash to‘g‘risida”gi qonunni bir qancha asoslar sabab rad etgandi.
Sog‘liqni saqlash vazirligi tomonidan 2024-yilning aprel oyida bir qator tamaki va nikotin mahsulotlari, elektron sigaretalar muomalasini taqiqlovchi, shuningdek, bu sohada javobgarlik joriy etishni nazarda tutuvchi qonun loyihasi muhokama uchun eʼlon qilgandi.
Unda nikotin va tamaki mahsulotlarining “zamonaviy” yoki “innovatsion” turlari, xususan nikotin yetkazib berishning elektron tizimlari, ular uchun suyuqliklar, gellar, shu jumladan elektron sigaretalar hamda tamakini qizdirish tizimlari, qizdiriladigan tamaki mahsulotlari O‘zbekistonga kirib kelishi va aholi, ayniqsa bolalar va yoshlar orasida ularni chekish keskin ko‘paygani qayd etilgandi.
2021—2023-yillarda O‘zbekistonga qiymati 28,5 mln dollarlik 5,4 mln dona elektron sigaretalar import qilingan bo‘lib, bu ko‘rsatkich avvalgi yillarga (2018—2020-yillarda 349 ming dollarlik 182 ming dona elektron sigaretalar import qilingan) nisbatan keskin ravishda – 80 baravarga oshgan.
Izoh (0)