Moskvada o‘tkaziladigan G‘alabaning 80 yilligiga bag‘ishlangan tantanali tadbirlarda qatnashish uchun o‘ttizga yaqin xorijiy davlat rahbarlari Rossiyaga tashrif buyuradi. Bu haqda Rossiya Federatsiyasi prezidentining yordamchisi Yuriy Ushakov ma’lum qildi.
“Ko‘plab xorijiy mehmonlar taklif etilgan va biz G‘alaba paradida taklif qilingan mamlakatlarning 29 nafar rahbari ishtirok etishini kutmoqdamiz”, deydi Ushakov.
Qayd etilishicha, paradda Ozarbayjon, Armaniston, Belarus, Qozog‘iston, Qirg‘iziston, Tojikiston, Turkmaniston, O‘zbekiston, Abxaziya, Bosniya va Gersegovina, Braziliya, Burkina Faso, Venesuela, Vyetnam, Gvineya Bisau, Misr, Zimbabve, Xitoy Xalq Respublikasi, Kongo, Kuba, Laos, Mo‘g‘uliston, Myanma, Falastin, Serbiya, Slovakiya, Ekvatorial Gvineya, Efiopiya va Janubiy Osetiya kabi mamlakatlarning oliy darajadagi rahbarlari ishtirok etadi. Shuningdek, Hindiston, Nikaragua va Janubiy Afrika Respublikasining “yetarlicha yuqori darajada”gi shaxslari qatnashadi.
Ushakovning ta’kidlashicha, parad va bayram tadbirlarida ishtirok etish uchun SHHT, MDH, KXSHT, Islom hamkorlik tashkiloti, Rossiya va Belarus ittifoq davlati, Afrika ittifoqi komissiyasi bosh kotiblari, Yangi taraqqiyot banki prezidenti ham taklif etilgan.
“Paradga mamlakatimizda akkreditatsiyadan o‘tgan barcha diplomatik vakolatxonalar rahbarlari taklif etilgan. Shuningdek, bir qator davlatlarning mudofaa idoralari rahbarlari ham taklif qilingan va biz 34 ta davlat o‘z mudofaa vazirliklari vakillarini yuborishini kutmoqdamiz”, deydi Rossiya prezidenti yordamchisi.
Ma’lum qilinishicha, Qizil maydonda 13 ta mamlakatdan, xususan, Ozarbayjon, Vyetnam, Belarus, Misr, Qozog‘iston, Xitoy, Qirg‘iziston, Laos, Mo‘g‘uliston, Myanma, Tojikiston, Turkmaniston va O‘zbekistondan kelgan harbiylar ishtirokida paradlar o‘tkaziladi. Shuningdek, paradda Armaniston, Isroil, Mo‘g‘uliston va AQSH kabi bir qator xorijiy davlatlardan faxriylar ishtirok etishi rejalashtirilgan.
Ayni paytga qadar Xitoy Xalq Respublikas raisi Si Szinpin, Serbiya prezidenti Aleksand Vuchich, Mongoliya prezidenti Uxnaagiyn Xurelsuxlar Moskvaga yetib borgan.
Polsha, Litva va Latviya 9-may kuni Moskvada bo‘lib o‘tadigan G‘alaba paradida ishtirok etishi rejalashtirilgan Serbiya prezidenti Aleksandr Vuchich va Slovakiya bosh vaziri Robert Fitsolar bo‘lgan samolyotlarning o‘z havo hududi orqali uchishiga ruxsat bermagani xabar qilingandi.
Izoh (0)