Yevropa Ittifoqi Iordan daryosining G‘arbiy qirg‘og‘i va G‘azo sektoridagi falastinliklarga yordam ko‘rsatish uchun 1,6 milliard yevro ajratdi. Hozirda YI G‘azo sektorini nazorat qilmaydigan Falastin muxtoriyatining eng yirik homiysi hisoblanadi. Bu haqda 14-aprel, dushanba kuni Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallas ma’lum qildi.
“Biz Falastin xalqiga ko‘rsatayotgan yordamimizni kuchaytiryapmiz. 2027-yilgacha ajratilgan 1,6 milliard yevro G‘arbiy qirg‘oq va G‘azo sektorini barqarorlashtirish uchun xizmat qiladi. Yevropa Ittifoqi zarur infratuzilmaga sarmoya kiritish bilan birga, insonparvarlik yordami ko‘rsatib, qochqinlarni qo‘llab-quvvatlaydi. Biz Falastin muxtoriyatining ko‘p yillik hamkorimiz”, deya X ijtimoiy tarmog‘ida yozgan Kaya Kallas.
Uning xabari Falastin milliy ma’muriyati bosh vaziri Muhammad Mustafoning Lyuksemburgda Yevropa Ittifoqi mamlakatlari tashqi ishlar vazirlari bilan uchrashuvi arafasida e’lon qilindi. Kallas yordamning G‘azo sektoriga qanday yetkazilishi haqida aniq ma’lumot bermadi. FMA faqat Iordan daryosining G‘arbiy qirg‘og‘ini nazorat qiladi, G‘azo sektoridagi hokimiyatni esa 2007-yilda HAMAS guruhi egallab olgan.
Izoh (0)