Amerikalik senator Berni Sanders AQSHning Isroilga milliardlab dollarlik qurol yetkazib berishini to‘xtatishga urinmoqda, deb yozmoqda Anadolu.
Senat veb-saytida e’lon qilingan bayonotda Sanders bosh vazir Binyamin Netanyaxuning “ekstremistik hukumati” butun Falastin xalqiga qarshi “to‘liq urush” boshlaganini ta’kidladi. Shu munosabat bilan u Senatga yangi qurol-yarog‘ yetkazib berishni ma’qullamaslikka chaqiruvchi qarorni taqdim etdi.
Uning aytishicha, Netanyaxu G‘azo sektoridagi binolarning qariyb 70 foizini vayron qilish uchun Amerika bombalaridan foydalanmoqda.
Tramp va Netanyahu millionlab falastinliklarni ko‘chirish, ya’ni etnik tozalash haqida ochiqchasiga gapirayotgan bir paytda, Isroilga ko‘plab tinch aholini o‘ldirish va G‘azoni yashash uchun yaroqsiz holga keltirishda ishlatiladigan bomba va qurollarni berish vijdonsizlik bo‘ladi, deydi senator.
AQSH Isroilga 2000 funtlik bombalar yubordi
9 oylik tanaffusdan keyin AQSHdan Isroilga 2000 funtlik MK-84 bombalar partiyasi yetib keldi. Amerika prezidenti Donald Tramp sobiq yetakchi Jo Baydenning 2024-yil mayidan buyon amalda bo‘lgan og‘ir qurollar yetkazib berishga qo‘ygan taqiqini bekor qildi.
Ma’lum qilinishicha, 15-fevral kuni kechasi og‘ir aviabombalar ortilgan kema Ashdod portiga yetib kelgan. O‘q-dorilar tezda tushirilib, havo kuchlari bazalariga yetkazilgan. Isroil Mudofaa vazirligining xabariga ko‘ra, yuk o‘nlab yuk mashinalarida tashilgan, logistika ishlari esa isroillik va amerikalik mutaxassislar hamkorligida amalga oshirilgan.
Vazirlik ma’lumotlariga ko‘ra, urush boshlanganidan beri Isroilga jami 76 ming tonnadan ortiq harbiy texnika yetkazib berilgan. Bu mamlakat tarixidagi eng yirik havo va dengiz orqali qurol-yarog‘ yetkazib berish operatsiyasi bo‘ldi.
Isroil mudofaa vaziri Isroil Kats Tramp ma’muriyatiga qo‘llab-quvvatlagani uchun minnatdorchilik bildirdi.
Bugun tunda Isroilga yetib kelgan va Tramp ma’muriyati tomonidan ruxsat berilgan o‘q-dorilar yetkazib berilishi bizning harbiy-havo kuchlarimiz va armiyamiz uchun sezilarli kuchayishdir. Bu, shuningdek, Isroil hamda Qo‘shma Shtatlar o‘rtasidagi mustahkam ittifoqning yana bir dalilidir, dedi Kats.
Izoh (0)