Samarqand shahrining “Charmgari” mahallasi hududidan o‘tuvchi avtomobil yo‘lida 9-may kuni soat 20:30 da uch kishi bir bolani kaltakladi. Bu haqda viloyat IIB matbuot xizmati xabar berdi.
Maʼlum qilinishicha, shaharning “Kaftarxona” mahallasida yashovchi 2007-y.t. shaxs o‘ziga tegishli bo‘lgan skuterda harakatlanib ketayotganida, unga oldindan tanish bo‘lmagan, Samarqand tumani “Gulobod” mahallasida yashovchi 2005, 2008 va 2012-y.t. aka-ukalar otasi boshqaruvidagi Malibu’da ketayotgan vaqtida o‘zaro janjal kelib chiqqan.
Mazkur janjal davomida 3 nafar aka-uka skuter haydovchisini urib, tan jarohati yetkazgan.
Holat yuzasidan Jinoyat kodeksining 277-moddasi 2-qismi (bezorilik) bilan jinoyat ishi qo‘zg‘atilib, dastlabki tergov harakatlari olib borilmoqda.
O‘zbekistonda 2024-yilda 469 568 kishi maʼmuriy javobgarlikka tortilgan. Ko‘rilgan maʼmuriy huquqbuzarlik to‘g‘risidagi ishlarning aksariyatini mayda bezorilik kabi huquqbuzarliklar bo‘lgan. 2024-yilda jinoyat ishlari bo‘yicha sudlar tomonidan 77 995 nafar shaxsga nisbatan 61 481 ta jinoyat ishi ko‘rib chiqilgan. Sudlanganlar soni 61 502 nafarni tashkil etib, shundan 20 659 kishiga ozodlikdan mahrum qilish va 39 763 nafariga boshqa turdagi jazolar tayinlangan, 1 080 nafar shaxs shartli hukm qilingan.
Izoh (0)