Toshkent viloyatining Chirchiq shahrida yashovchi 32 yoshli fuqaro Murod Qudaboyev spirtli ichimliklar sotuvchi do‘kon egasi tomonidan kaltaklanishi oqibatida vafot etdi. Zo‘ravon sotuvchiga nisbatan jinoyat ishi qo‘zg‘atilgan. Bu haqda “Daryo” so‘roviga javoban bosh prokuratura axborot xizmati rahbari Hayot Shamsutdinov maʼlum qildi.
Aniqlanishicha, viloyatning Parkent tumanida tug‘ilgan, ammo ayni kunda Chirchiq shahrida yashovchi 38 yoshli tadbirkor Hamid Do‘stov 2025-yilning 5-mart kuni soat taxminan 19:00 larda o‘ziga tegishli savdo do‘konini yopib, ketayotgan paytda Chirchiq shahrida yashovchi tanishi Murod Qudaboyev kelib, unga ichimlik berishini so‘ragan. Do‘kon egasi unga ishini tamomlaganini, uyiga ketayotganini aytsa-da, 32 yoshli erkak spirtli ichimlik sotishini talab qilgan. Ularning o‘rtasidagi muloqot tortishuvga aylangan.
Janjal vaqtida do‘kon egasi qo‘li va oyoqlari bilan Murodning boshi va yuz qismiga bir necha marotaba urib, unga og‘ir tan jarohati yetkazgan. Natijada fuqaro Chirchiq shahar tibbiyot birlashmasiga olib borilgan. Bosh miya ochiq jarohati, bosh miya lat yeyishi, chap chakka tepa suyaklari ochiq sinishi, boshning o‘ng qosh tepa, chap chakka tepa sohasi ezilib yirtilishi kabi travmatik shok olgan erkak shifokorlar ko‘rsatgan yordamga qaramay 6-mart kuni vafot etgan.
O‘zini marhumning onasi deb tanishtirgan ayol ijtimoiy tarmoqda voqea tafsilotini boshqacha talqin qilgandi.
Unga ko‘ra, 5-mart kuni 18:00 ga yaqin o‘g‘li Hamid Do‘stov tomonidan jismoniy zo‘ravonlikka uchragan. Murod hushsiz holatda shifoxonaga olib ketilgan, u komadan chiqmagan.
“Bundan tashqari, o‘sha kuni Hamid bir ayolni ham urgan (ayol tirik, lekin davolanishga muhtoj holatda). Murod o‘sha ayolni himoya qilishi ortidan jarohatlar olgan. U 2025-yil 6-mart kuni soat 21:00 da vafot etdi. 7-mart kuni uni dafn etdik. Muroddan bir o‘g‘il nevaramiz qoldi”, degan marhumning onasi.
Holat yuzasidan Chirchiq shahar IIB huzuridagi Tergov bo‘limi tomonidan Jinoyat kodeksining 104-moddasi 3-qismi “d” bandi (qasddan badanga og‘ir shikast yetkazish jabrlanuvchining o‘limiga sabab bo‘lsa) bilan jinoyat ishi qo‘zg‘atilib, do‘kon sotuvchisi qamoqqa olingan.
Qonunchilikka ko‘ra, bunday qilmishni sodir etgan fuqaro sakkiz yildan o‘n yilgacha ozodlikdan mahrum qilinishi mumkin.
Izoh (0)