Bugun Sharliz Teron Gollivudning eng mashhur aktrisalaridan biri. Lekin uning aktyorlik taʼlimi yo‘qligini bilarmidingiz? U syomka maydonchalariga bir noodatiy hodisa tufayli tushib qolgan.
Teron 18 yoshida Gollivudga kelgan. Undan oldin aktrisa jarohat olgani tufayli balet mashg‘ulotlarini tashlashga majbur bo‘lgan va modellik bilan shug‘ullangan. Moliyaviy ahvoli ham tang edi va bir kuni Sharliz Los Anjelesdagi bank bo‘limida janjal chiqarishga majbur bo‘lgan.
U Nyu Yorkdagi moda kataloglari uchun suratga tushgani uchun olgan chekini naqd pul qilishga harakat qilgan, ammo bank xodimi bundan bosh tortgan, chunki chek boshqa shtatda berilgan.
“Bank uni qabul qilmadi, menga esa pul juda kerak edi. Shuning uchun kassirdan yordam berishini iltimos qila boshladim. Men iltimos qilaverdim, shu payt bir kishi kelib, menga yordam berishga harakat qildi”, deb Opra Uinfri bilan suhbatda Teron hikoya qilgan.
Bo‘lajak yulduz o‘shanda bankdagi janjal uning birinchi kastingiga aylanishini bilmagan edi, chunki bu rahmdil odam o‘sha paytda Jon Xert va Rene Russo manfaatlarini himoya qilgan agent Jon Krosbi bo‘lgan. Tez orada u Teronning agentiga aylandi.
“Bankdan chiqayotib, yordam bergan odam menga tashrif qog‘ozini berdi. Agar qiziqsangiz, sizga vakillik qilaman, dedi”, deb eslaydi aktrisa. Shunday qilib, o‘z vaqtida bankda uyushtirilgan janjal tufayli Teron Gollivudga kirib keldi.
Izoh (0)