Samarqand viloyatining Kattaqo‘rg‘on shahrida kafeda janjal ko‘tarib, ichki ishlar xodimlariga qarshilik ko‘rsatgan shaxslarga nisbatan jinoyat ishi qo‘zg‘atildi. Bu haqda viloyat IIB xabar berdi.
Qayd etilishicha, 11-may kuni Kattaqo‘rg‘on shahrining “Zarafshon” MFYda joylashgan oshxonalarning birida janjal bo‘layotgani haqida IIB ga xabar kelib tushgan. Voqea joyiga uch nafar profilaktika inspektori yetib borganida, 4 nafar shaxs mast holatda oshxona egalari bilan janjallashayotgani ma’lum bo‘lgan.
Shundan so‘ng qonunbuzarlardan biri oshxona egasi bo‘lgan ayolni haqoratlab, unga qo‘l ko‘tarayotganida IIB xodimlari ularni ajratishga harakat qilgan. Biroq janjal ko‘targan shaxslar profilaktika inspektorlarining qonuniy talabini bajarmay, ularni ham haqoratlab, qochishga uringan, ulardan biri Cobalt rusumli mashinasida IIB xodimini qasddan turtib ketgan.
Aniqlanishicha, ushbu shaxslar tamaddixonadan pul to‘lamay chiqib ketmoqchi bo‘lgan va natijada oshxona ishchilari bilan o‘rtalarida janjal yuz bergan.
Hozirda mazkur holat yuzasidan Kattaqo‘rg‘on shahar prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan gumonlanuvchilar protsessual tartibda qamoqqa olingan va tergov harakatlari olib borilmoqda.
Eslatib o‘tamiz, 2023-yil yanvar oyida Jizzaxdagi kafeda xo‘randalar ovqat uchun pul to‘lamagani sababli janjal sodir bo‘lgandi.
Izoh (0)