Samarqandda fuqarolarga nisbatan amaldagi qonunchilikka zid ravishda jismoniy kuch ishlatgan xodim tizimdan bo‘shatildi. Bu haqda Samarqand viloyati Ichki ishlar boshqarmasi axborot xizmati xabar berdi.
Maʼlum qilinishicha, 9-iyun kuni jamoat tartibini saqlash, fuqarolarning xavfsizligini taʼminlash maqsadida tungi xizmatga jalb qilingan Samarqand shahar bo‘yicha IIO FMB profilaktika inspektori S.Eshonqulov soat 22:00 larda Samarqand shahar Dahbet ko‘chasidagi avtomobil yo‘lining qatnov qismida fuqarolar janjal qilayotganini ko‘rgan.
Xodim ularni 6-son IIBga olib borgan, fuqarolarning sodir etgan qilmishini rasmiylashtirishi davomida profilaktika inspektori va ushbu shaxslar o‘rtasida kelishmovchilik yuzaga kelgan.
Jarayonda profilaktika inspektori ikki nafar fuqaroga nisbatan (ulardan biri ayol) amaldagi qonunchilikka zid ravishda jismoniy kuch ishlatgan.
Holat yuzasidan xizmat tekshiruvi o‘tkazilib, profilaktika inspektori S.Eshonqulov ichki ishlar organlari safidan bo‘shatilgan.
To‘plangan hujjatlar ishtirokchilarning harakatlariga huquqiy baho berish uchun prokuratura organlariga yuborilgan.
Izoh (0)