Navoiy viloyatida to‘rt oylik farzandini sotishga uringan ayolga sud hukmi o‘qildi. Bu haqda Oliy sud matbuot xizmati rahbari Aziz Abidov ma’lum qildi.
Qayd etilishicha, Samarqand viloyati Paxtachi tumanida tug‘ilgan 27 yoshli ayol 2016-yilda o‘ziga tanish bo‘lgan erkak bilan shar’iy nikoh o‘qitib, birga yashay boshlagan. 2021-yilda ularning birinchi farzandi tug‘ilgan. To‘ng‘ich farzandi bir yoshga to‘lmasidan ayol ikkinchi bolasini dunyoga keltirgan. Ammo ota-ona o‘g‘il chaqaloqni boqib katta qilishni istamay, o‘z xohishi bilan undan voz kechishga qaror qilib, Paxtachi tumani hokimligiga murojaat qilgan. Natijada vasiylik organi orqali chaqaloq farzandsiz oila qaramog‘iga topshirilgan.
Oradan ikki yil o‘tib, ayol uchinchi farzandiga homilador bo‘lgani bois er-xotin o‘rtasiga janjal chiqqan. Er tomonidan kaltaklangan ayol bir oylik homilasi bilan uydan chiqib ketgan. Navoiy shahridagi ijara uyda yashab kelgan ayol 2023-yil 7-iyulda qiz farzandini dunyoga keltirgan va unga xaridor izlay boshlagan.
O‘sha yilning noyabr oyida ayol 4 oylik chaqalog‘ini Karmana tuman tibbiyot birlashmasi hovlisida shartli xaridorga 10 million so‘mga sotayotgan vaqtida qo‘lga olingan.
Jinoyat ishlari bo‘yicha Uchquduq tuman sudida Jinoyat kodeksining 135-moddasida (odam savdosi) nazarda tutilgan jinoyatni sodir etgan muqaddam sudlangan ayolga oid jinoyat ishi ko‘rib chiqilib, unga 8 yil muddatga ozodlikdan mahrum qilish jazosi tayinlandi.
Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)