Instagram’da Kokosh taxallusi bilan vaynlar suratga oladigan 33 yoshli bloger Komila Abduqodirova Toshkentdagi xususiy klinikada liposaksiya va abdominoplastika amaliyotlarini boshdan kechirganidan so‘ng, operatsiya asoratlari bilan kurashmoqda.
— Men 3-mart kuni abdominoplastika va liposaksiya operatsiyalarini qildirgandim, shu bilan 25 kundan buyon yotibman. Operatsiyaning ertasi kuni qornimdagi qora dog‘ni ko‘rib, shifokordan “Bu nima?”, deb so‘rasam, “gematoma”, deb javob berishdi. Ya’ni qontalash bo‘lib qolgan, ketadi, deyishdi. Shu bilan oradan 25 kun o‘tdi, lekin qora dog‘ ketmadi. Shundan so‘ng xavotirlanib, boshqa doktorlarga murojaat qildim. Ular esa “Bu nekroz, zudlik bilan qarating”, deyishdi.
Keyin men bularga aytib, janjal qilganimdan so‘ng e’tibor qaratishdi. Qora joyini olib tashlanglar, dedim. U narsa olib tashlanganidan keyin hozir qornim ochilib yotibdi. Meni apparatga ulab qo‘yishgan. Sizlardan iltimosim, bu klinikaga umuman kelmanglar. Meni operatsiya qilgan bola 2002-yilda tug‘ilgan, hujjati ham yo‘q ekan. U hali talaba, operatsiya xonasiga umuman kirishi mumkinmas ekan, qo‘pol qilib aytganda ular qassoblik qilishdi. Bu klinikaga qo‘lingizni bog‘latish uchun ham kelmang”, deydi Komila Abduqodirova.
“Med Consultant” xususiy klinikasi tomonidan berilgan ma’lumotnomada Komila Abduqodirovaga qorin teri osti yog‘ qavatini naychalash (liposaksiya, abdominoplastika) amaliyoti bepul o‘tkazilgani qayd etilgan.
“Amaliyotdan keyingi davolanish jarayonida bemorga berilgan tavsiyalarga (ko‘chaga chiqmaslik, mashina haydamaslik, energetik ichimliklar ichmaslik) rioya qilmasligi oqibatida jarohat sohasida yallig‘lanish va terida taxminan 5-6 santimetrli to‘qima nekrozi yuzaga keldi. Shundan so‘ng bemorga amaliyotdan keyingi nekroz to‘qimalarni olib tashlash va yaraga manfiy bosimli davolash tizimi qo‘yildi”, deyiladi ma’lumotnomada.
Komila Abduqodirovaning yaqinlari uni Turkiyaga olib ketib, o‘sha yerda davolatish choralari ko‘rilayotganini aytmoqda.
Kokosh Instagram’da 455 ming obunachiga ega, u asosan kulgili vaynlar suratga oladi.
2024-yilning dekabr oyida xuddi shunday amaliyotni boshdan kechirgan aktrisa Halima Ibragimova teri bitmasligi oqibatida vafot etgandi.
Izoh (1)
Аллоҳни берган неъматини борича қабул қилиш керак. Танага бўлар бўлмас ўзгартириш киргизиш бандасигамас, қачонки соғлиққа хавфи бўлсагина рухсат этилган. Аллоҳга хуш келмайдиган иш қилиш шунақа оқибатларга олиб келади