O‘zbekiston Bosh konsulxonasi xodimlari tomonidan Yekaterinburg shahrida oilaviy zo‘ravonlik qurboni bo‘lgan ayol va uning voyaga yetmagan farzandlariga amaliy yordam ko‘rsatildi.
Xabar berilishicha, joriy yilning 1-aprel kuni O‘zbekiston fuqarosi M.T. Yekaterinburg shahrida vaqtincha yashayotgan qizi va uning bolalarini turmush o‘rtog‘ining zulmidan ozod qilish va doimiy yashash manziliga yetib olishiga amaliy yordam berishni so‘rab murojaat qilgan.
Mazkur oila 2024-yil yanvar oyida Yekaterinburg shahriga ishlash maqsadida kelgan. Oiladagi kelishmovchiliklar, doimiy tazyiq va urush janjal ayolga jiddiy ruhiy ta’sir ko‘rsatgan. Bosh konsulxona xodimlari ushbu oila yashayotgan xonadonda bo‘lib, mavjud holat bilan yaqindan tanishdi.
Shundan so‘ng ayol va uning bolalari vaqtincha uy-joy bilan ta’minlandi. Ularning shaxsini tasdiqlovchi hujjatlari yaroqsiz holga kelgani va moliyaviy qiyin ahvolda qolgani uchun vatanga qaytish guvohnomasi hech qanday to‘lovlar undirilmasdan rasmiylashtirildi.
Shuningdek, Yekaterinburg—Samarqand aviaqatnoviga chipta xarid qilib berildi. Ular 8-aprel kuni Yekaterinburg shahridagi “Kolsovo” xalqaro aeroportidan Samarqand viloyatiga kuzatib qo‘yildi.
O‘zbekistonga qaytarilayotgan fuqarolar
2025-yilning boshlarida Rossiyaning Tiva Respublikasi Oq Dovurak shahrida vaqtincha ishlayotgan to‘rt nafar O‘zbekiston fuqarosi vatanga qaytarildi. Fuqarolarning yashash joyida sodir bo‘lgan kuchli yong‘in natijasida ularning hujjatlari, shu jumladan, pasportlari yo‘qolgan.
27-fevral kuni Makkada og‘ir kasallikka chalingan o‘zbekistonlik vatanga qaytarildi. Fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarildi.
2025-yil 5-mart kuni Rossiyaning Vladivostok shahrida og‘ir tan jarohati olgan O‘zbekiston fuqarosi vatanga qaytarildi. Mart oyining o‘rtalarida Novosibirskdagi Bosh konsulxonasi ko‘magida Rossiyaning Saxa respublikasi Neryungri shahrida qiyin hayotiy vaziyatga tushib qolgan ona va uning to‘rt nafar farzandi O‘zbekistonga qaytarildi. 17-mart kuni ota-ona qaramog‘isiz qolgan 10 nafar voyaga yetmagan bola Qozog‘istondan O‘zbekistonga qaytarildi. Shuningdek, Rossiyada ota-ona qaramog‘isiz qolgan 30 nafar bola O‘zbekistonga qaytarildi.
Izoh (0)